نوێترین چاوپێکەوتنى بارتۆمیۆى سەرۆکى بەرشەلۆنە

نوێترین چاوپێکەوتنى بارتۆمیۆى سەرۆکى بەرشەلۆنە
2020-07-07

3476 جار خوێندراوەتەوە

+ -

سەرۆکى بەرشەلۆنە پێیوایە لیۆنێل میسی لە یانەکەیدا دەمێنێتەوە و خۆشى هەرگیز بیرى لە دەستلەکارکێشانەوە نەکردووەتەوە.

لە چاوپێکەوتنێکى ڕادیۆییدا، جۆسێپ ماریا بارتۆمیۆى سەرۆکى بەرشەلۆنە ئاماژەى بەوە کرد، خۆى و یانەکەشى پاڵپشتى لە بەکارهێنانى تەکنەلۆجیاى ڤار دەکەن، بەڵام پێیوایە لە دواى ڕاگیرانى یارییەکانەوە دادپەروەرانە نەماوە.

بارتۆمیۆ باس لەوە دەکات، هیچ گەندەڵییەک و دۆسیەیەکى ناوزڕاندنى یاریزانان لە ئارادا نییە و سەلماندوشیانە کە ئەو باسە ڕاست نییە، هەرگیزیش بیرى لە دەستلەکارکێشانەوە نەکردووەتەوە.

بارتۆمیۆ لە بارەى داهاتووى میسى کاپتنى یانەکەى دەڵێت "من دڵنیام میسى لە بەرشەلۆنە دەمێنێتەوە و پێشتریش وتوویەتى لێرە واز لە یاریکردن دەهێنێت و منیش دڵنیام هەر وادەکات".

بارتۆمیۆ باس لە پۆستى ڕاهێنەرایەتى یانەکەى دەکات و دەڵێت "لە دوورخستنەوەى ڤاڵڤێردى پەشیمان نیم، ئەو کات پێویستمان بە گۆڕانکارى بوو، کیکى سێتینیش بیرکردنەوەى نوێى هێناوە و بەردەوامیش دەبێت".

سەرۆکى یانە کەتەلۆنیەکە لەسەر پرۆسەکەى نیمار ئاماژە بەوە دەکات، کارەکە گونجاو نییە، لەبەرئەوەى هەموو یانەکانى ئەوروپا لە دۆخێکى قورسدان.

 

گ . ف

 

زۆربەى قسەکانى بارتۆمیۆ لە چاوپێکەوتنەکەدا:

بارتۆمیۆ: هەرگیز بیرم لە دەستلەکارکێشانەوە نەکردووەتەوە و بەڵکو بەپێچەوانەوە ئێستا کاتى کارکردنى جدییە.

بارتۆمیۆ: هیچ گەندەڵییەک و دۆسیەیەکى ناوزڕاندنى یاریزانان لە ئارادا نییە و سەلماندیشمان کە ئەو باسە ڕاست نییە.

بارتۆمیۆ: پرۆسەکەى نیمار گونجاو نییە لەبەرئەوەى هەموو یانەکانى ئەوروپا لە دۆخێکى قورسدان.

بارتۆمیۆ: هیچ کەسێک دەستى نەخستووەتە خەزێنەى یانەکەوە، هەر لەبەرئەوەش داواى یاساییمان لەسەر ئیمیلى ڕوسود تۆمارکردووە.

بارتۆمیۆ: گۆڕانکارى لە کارگێڕى یانەکەدا؟ پێویست بوو گۆڕانکارى بکرێت، پێویست بوو بە ئازایانە بڕیارەکان بدەم.

بارتۆمیۆ: من و یانەکەشم بە توندى پاڵپشتى لە ڤار دەکەین، بەڵام لە دواى ڕاگیرانى یارییەکانەوە دادپەروەرانە نەماوە.

بارتۆمیۆ: من لەسەر دوورخستنەوەى ڤاڵڤێردى ڕاهێنەر پەشیمان نیم، ئەو کات پێویستمان بە گۆڕانکارى بوو، کیکى سێتینیش بیرکردنەوەى نوێى هێناوە و بەردەوامیش دەبێت.

بارتۆمیۆ: من بە بەرەوپێشچوونى تیپەکەمان دڵخۆشم، لەگەڵ بوونى کێشەکاندا، بەڵام وێنەیەکى نوێم بینى لە دواین یارییەکاندا و هیواداریشن لەسەر ئەو ڕووە بەردەوامبین.

بارتۆمیۆ: گەر لالیگاش لەدەستبدەین، هێشتا چامپیۆنز لیگمان لەبەردەمدایە.

بارتۆمیۆ: دابەزینى ئیسپانیۆڵ؟ هەردەم پێمخۆشە تیپە کەتەلۆنیەکان لە پلە یەکى لالیگادا ببینم، هەروەها جیرۆناش.

بارتۆمیۆ: هەموو هەوڵى خۆمان دەدەین بۆ کردنى یارییەکەمان بەرامبەر ناپۆلى لە یاریگاى کامپ نۆدا، لەگەڵ یوفا لە گفتوگۆداین لەو بارەیەوە.

بارتۆمیۆ: من دڵنیام میسى لە بەرشەلۆنە دەمێنێتەوە و پێشتریش وتوویەتى لێرە واز لە یاریکردن دەهێنێت و منیش دڵنیام هەر وادەکات، لە دواى ماوەى سەرۆکایەتى منیش لە یاریکردن بەردەوام دەبێت و بۆ چەندین ساڵ دەمێنێتەوە

بارتۆمیۆ: ناتوانم خۆم بۆ هەڵبژاردنەکانى داهاتوو بپاڵێوم، لەبەرئەوەى یاساکان ڕێگریم لێدەکەن.

بارتۆمیۆ: ڕۆیشتنى میسى؟ هەردەم ئەو دەنگۆیانە لە ڕادیۆى کادینا سێر بڵاودەکرێنەوە، پابەندیمان هەیە بە نوێکردنەوەى گرێبەستەکەى باشترینى مێژووەوە.

بارتۆمیۆ: دواین جار لە شەممەى ڕابردوو بوو قسەم لەگەڵ میسى کرد، هەردەم قسە لەگەڵ یاریزانەکان دەکەم بەتایبەتى کاپتنەکان، چونکە چەند کێشەیەکمان هەیە کفتوگۆیان لەبارەوە دەکەین.

بارتۆمیۆ: چاڤى ڕاهێنەرێکى باشە، ڕۆژێک لە ڕۆژان لە بەرشەلۆنە دەبێت.