سەردێڕ:

بە هۆى کەوتنەوەى ئاگرەوە هاوڵاتییەکى نابیناى تەمەن ٧٨ ساڵ گیانى لەدەستدا

فۆتۆ: 
2018-11-14

3434 جار خوێندراوەتەوە

خانوویەکی بچووکی دوورە دەستى ناو گەڕەکێکی گەورەی حاجیاوا ماوەى پێنج ساڵ بووەتە شوێنى مانەوەى هاوڵاتییەکى نابینا، کە بە درێژایی ئەو ماوەیە بە تەنها تێیدا ژیاوە و هەر بە تەنهاش لەو خانووەدا سەرینایەوە.

ئەو هاوڵاتییە کە ناوى خدر عەلییە و تەمەنى ٧٨ ساڵە، بەرەبەیانى چوارشەممە بڵێسەى ئاگر لە ماڵەکەى بەرزبووەوە و بەهۆیەوە بەشێک لە جەستەى سوتا و گیانى لەدەستدا.

ھاوڵاتییەکی شایەتحاڵى ڕووداوەکە دەڵێت، بینیویەتى ئاگر و دووکەڵ لە خانووەکەدا بەرزدەبێتەوە، بۆیە خەڵکى ناوچەکەى ئاگادارکردووەتەوە بۆئەوەى هەوڵى کوژاندنەوەى ئاگرەکە بدەن.

دوای نیو کاتژمێر لە کەوتنەوەی ئاگرەکە، تیمەکانی ئاگرکوژێنەوە گەیشتنە شوێنەکە و ئاگرەکەیان کۆنترۆڵکرد.

ھەرچەندە بەھۆی ڕووداوەکەوە خدر عەلی ٢٠%ی جەستەی سوتابوو، بەڵام بەھۆی کاریگەرى ھەڵمژینی دووکەڵ و ژەھراویبوونەوە ھەر لەناو ژوورەکەیدا گیانى لەدەستدابوو.

بەپێی لێکۆڵینەوەکانى بەرگریی شارستانی ڕاپەڕین، کەوتنەوەی ئاگرەکە بەھۆی ھیتەری کارەباییەوە بووە کە خاولییەکی لە نزیکەوە دانراوە و پاش گڕگرتنى خانووەکەش گڕیگرتووە.

خدر عەلی کە لەو ڕووداوەدا گیانى لەدەستدا بە سۆفی خدر ناسراوە و  ھاوسەرگیریی نەکردبوو، ئەم خانووەشى لەلایەن هاوڵاتییەکەوە بۆ دروستکراوە، ھەر ئەویش ژەمە خۆراکی بۆ دابینکردووە.

ئەو هاوڵاتییە کە ڕێژەى نابینایی چاوەکانى لە سەدا سەد بووە، هیچ موچەیەکى لەلایەن حکومەتەوە بۆ نەبڕدرابووەوە و لەلایەن خەڵکییەوە هاوکارى دەکرا.

لە ماوەى ١٥ ڕۆژدا ئەمە دووەمین ڕووداوى ئاگرکەوتنەوەیە لە سنوری ئیدارەی ڕاپەڕین کە بەھۆیەوە شەش ھاوڵاتی گیانیان لەدەستداوە.

‌بەپەلە