سەردێڕ:

وەزیری پێشمەرگە: لێکتێگەیشتنی باش لەنێوان پێشمەرگە و سوپای عێراق هاتووەتە ئاراوە

فۆتۆ: 
2021-05-13

1635 جار خوێندراوەتەوە

وەزیری پێشمەرگەی هەرێم لە میانی سەردانێکیدا بۆ هەردوو میحوەری باشیک و خازر-موسڵ رایگەیاند، لێکتێگەیشتنی باش لەنێوان پێشمەرگە و سوپای عێراق هاتووەتە ئاراوە.


ئەمڕۆ پێنجشەممە، شۆڕش ئیسماعیل وەزیری پێشمەرگەی حکومەتی هەرێمی کوردستان لە سەردانێکیدا بۆ هەردوو میحوەری باشیک و خازر-موسڵ پیرۆزبایی جەژنی لە پێشمەرگەکان کرد و رایگەیاند، "هیواخوازم ئەم جەژنە ببێتە مایەی سەقامگیری زیاتر و دەستکەوتی گەورەتر بۆ گەلەکەمان، لەم جەژنەدا دووپاتیدەکەینەوە بە یەکهەڵوێستی و تەبایی و یەکگرتوویی، پێکەوە کوردستانەکەمان دەپارێزین."

وەزیری پێشمەرگە باسی لەوەشکرد، "جێگەی دڵخۆشی ئێمە و هەمووانە هێزی پێشمەرگە لە تەواوی ناوچەکان سەنگەرەکانیان بە رووی چەکداران بەهێز و تۆکمەیە، هەمیشە ئامادەسازن بەرامبەر چەکداران بجەنگن"، وتیشی، "ئێمە وەکو وەزارەتی پێشمەرگە هەموو پاڵپشتی و پشتیوانی خۆمان دووپاتدەکەینەوە بۆ بەهێزکردنی توانای سەربازی و لۆجیستی بۆ روبەڕوبوونەوەی چەکداران و تێکشکاندن و لە ناوبردنیان."

شۆڕش ئیسماعیل راشیگەیاند، "ئەو لێکتێگەیشتنەی لەگەڵ وەزارەتی بەرگری عێراق هاتووەتە ئاراوە، جێی بایەخە و هیواخوازن بگاتە رێککەوتنێکی گشتگیر و کۆنکرێتی، کە زامنی پاراستنی ئاسایش و سەقامگیری ناوچەکە و تێکشکانی تەواوەتی چەکدارانی لێدەکەوێتەوە."

ئەوەش لەکاتێکدایە، ماوەیەکە چەکدارانی داعش دەستیان بە جموجوڵ کردووەتەوە و فەرماندەکانی پێشمەرگەش لە خۆرێکخستنەوەیان ھۆشداری دەدەن و داوا دەکەن بۆشاییەکانی نێوان پێشمەرگە و سوپای عێراق پڕبکرێتەوە.

شەوی رابردووش، لە سنوری ناحیەی زینانە چەکدارانی داعش ھێرشیان کردە سەر ھێزەکانی پێشمەرگە و بەو ھۆیەوە، پێشمەرگەیەک شەھید بوو.