سەردێڕ:

پارێزگاری هەولێر: دوای جەژن کێشەی زەوییەکانی هەشتی حەسارۆک چارەسەر دەکرێن

فۆتۆ: 
2021-05-13

1157 جار خوێندراوەتەوە

پارێزگاری هەولێر رایگەیاند، سەرۆکی حکومەت جدییە لە چارەسەرکردنی کێشەی زەوییەکانی هەشتی حەسارۆک، بۆ ئەو بابەتەش وەزارەتی شارەوانی و پارێزگای هەولێری راسپاردووە. هاوکات، داوا لەهاوڵاتیان دەکات لەکاتی پیرۆزبایی جەژن و تێکەڵبوونە کۆمەڵایەتیەکان رەچاوی بەریەککەوتن بکەن و پابەندی رێنماییە خۆپارێزیەکان بن.


ئەمڕۆ پێنجشەممە، ئومێد خۆشناو پارێزگاری هەولێر لە کۆنفرانسێکی هەواڵیدا رایگەیاند، لەهەرێم بڕیاردراوە هیچ گروپێکی گەشتیاری لە رۆژانی جەژندا رێگەی پێنادرێت بێتە ناو پارێزگاکانی هەرێمەوە، هاوکات، لە عێراقیش قەدەغەی هاتووچۆی سەرتاسەری راگەیەنراوە.

لەبارەی بڕیاری سەرۆکی حکومەت بۆ چارەسەر کردنی کێشەی زەوییەکانی ٨ی حەسارۆک راشیگەیاند، سەرۆکی حکومەت جدییە لە چارەسەرکردنی ئەو کێشەیە وبۆ ئەو مەبەستەش وەزارەتی شارەوانی و پارێزگاری هەولێری راسپاردووە.

وتیشی، دوای جەژن کێشەى زەوییەکانى ٨ى حەسارۆکان و ئەو گەڕەکە هاوشێوانەی هەن چارەسەر دەکرێن.

هاوکات، دوێنێ مەسرور بارزانی سەرۆکی حکومەتی هەرێم لە سەردانێکیدا بۆ زەوییەکانی ٨ی حەسارۆک لە هەولێر رایگەیاند، چی زووە مۆڵەت و رێگەپێدانیان بۆ دروستکردنی بینا پێبدرێت.

هاوکات، لە کاتی بەشداریکردنی لە نانخواردنی جەژن لەگەڵ خانەی سەرپەرشتیارانی هەولێر پارێزگار تایبەت بۆ ئێن ئاڕتی دواو تیایدا داوای لەهاوڵاتیانکرد، لەکاتی پیرۆزبایی جەژن و تێکەڵبوونە کۆمەڵایەتیەکان رەچاوی بەریەک کەوتن بکەن و پابەندی رێنماییە خۆپارێزیەکان بن.

ئەوەشی خستەڕوو، دەزگا پەیوەندیدارەکان راسپێردراون لە شوێنە گشتتیەکان چاودێری خەڵک بکەن  و رێنماییان بکەن، هاوکات، لەبەرامبەر سەرپێچی کارانیشدا رێکار دەگیرێتەبەر.

لەبارەی کردنەوەی شوێنە گشتیەکان ئاماژەی بەوەشدا، هەموو شوێنێک لە نانەواخانە و مارکێتەکان لە سنوری پارێزگای هەولێرکراوەیە، بەڵام بەمەرجی خۆپارێزی بە چاودێری دەزگاکان.