سەردێڕ:

فەرماندەیەکی پێشمەرگە: ئەو چەکەی لای داعش هەیە لای سوپای عێراقیش نییە

فۆتۆ: 
2021-05-12

10032 جار خوێندراوەتەوە

فەرماندەیەکی پێشمەرگە لەمیحوەری قەرەتەپە دەڵیت، "شەهید موحسین، خۆی فەرماندەی سەنگەرەکە بووە و بە بی کەی سی تەقەی کردووە و سەرەتا بریندار بووە و لە کفرییەوە ئامبوڵانسمان بۆ هاتووە و لە کەلار گیانی لەدەستدا".


ئەمڕۆ چوارشەمە، محەمەد رۆستەم، جێگری میحوەری قەرەتەپە و فەرماندەی پێشمەرگە، بە ئێن ئاڕتی راگەیاند،:" ئێمە پێشەوەمان چۆڵە و چەکدارانی داعش هێزێکی ونبوون، ئەم ناوچەیە جوگرافیا و دیمۆگرافیایەکی تایبەتی هەیە و شوێنی حەشارگەیان هەیە و چەندین جار لە لایەن هێزەکانی ٧٠ ەوە دەستگیرکراون.

فەرماندەکەی پێشمەرگە وتیشی، "کاتژمێر ٩:٥٠خولەک جەنگەکە دەستی پێکرد و چەکدارانی داعش لە سێ قۆڵەوە تەقەیان لە سەنگەرەکانی پێشمەرگە کردووە و لە قۆڵێکیانەوە کاریگەری هەبووە".

راشیگەیاند، "شەهید موحسین (ئەو پێشمەرگەیەی کە شەهید بووە)، خۆی فەرماندەی سەنگەرەکە بووە و بە بی کەی سی تەقەی کردووە و سەرەتا بریندار بووە و لە کفرییەوە ئامبوڵانسمان بۆ هاتووە و ئاسایشی کفریش هاوکارمان بوون و بریندارەکەیان گەیاندە کەلار و لە کەلار گیانی لەدەستدا".

محەمەد رۆستەم ئاماژەی بۆ ئەوەشکرد، کە پانتاییەک لەمدیوی رێگای گۆبانەوە تا دەچێتەوە ئەو دیوی دوزخورماتوو بۆشایی ئەمنیە و بە هۆی جوگرافیاکەیەوە ناتوانین هێز ببەینە ئەو شوێنە".

هەروەها سەبارەت بە چەک جێگری میحوەری قەرەتەپە رایگەیاند، "جیاوازی زۆر هەیە لە چەکەکانی داعش و هێزەکانی پێشمەرگە و ئەو چەکانەی کە چەکدارانی داعش لایانە، لای سوپای عێراقیش نییە".

 

شەوی رابردوو، لە سنوری ناحیەی زینانە چەکدارانی داعش هێرشیان کردە سەر هێزەکانی پێشمەرگە ولە ئاکامدا پێشمەرگەیەک شەهید بوو.