سەردێڕ:

فەرماندەی میحوەری رۆژئاوای کەرکوکی پێشمەرگە: هەماهەنگیمان لەگەڵ عێراقدا نییە

فۆتۆ: 
2021-05-01

6581 جار خوێندراوەتەوە

فەرماندەی میحوەری رۆژئاوای کەرکوکی پێشمەرگە رایگەیاند، هەموو هێزێکی سەربازیی پێویست و تەواوی پێداویستییە لۆجستییەکانیان لەبەردەستدایە و پێویستییان بە هێزی زیادە نییە، دەشڵێت، "هیچ هەماهەنگییەکیان لەگەڵ حکومەتی عێراقیدا نییە".


ئەمڕۆ شەممە، نوری حەمە عەلی فەرماندەی میحوەری رۆژئاوای کەرکوکی پێشمەرگە لە کۆنفرانسێکی رۆژنامەنوسیدا باسی لەوەکرد، لە هێرشەکەی شەوی رابردوودا سێ پێشمەرگە شەهید بووە و دوو پێشمەرگەی دیکەش بریندارە، دەشڵێت، "هێزەکانی پێشمەرگە چەک و هێز و پێداویستی و ئیمکانیەتی و سەنگەری باشی هەیە، بەڵام لە کاتێک لە دووری ٥٠٠ مەترەوە هێرشدەکرێت ئەوە پەیوەندی بە چەکەوە نییە".

فەرماندەی میحوەری رۆژئاوای کەرکوکی پێشمەرگە ئاماژەی بەوەکرد، پێویستە حکومەتی عێراقی پابەندی رێککەوتنەکانی بێت و رێککەوتنامەی شەنگال جێبەجێ بکات، ئەگەر نا ئەو هێرشانە دووبارە دەبنەوە.

نوری حەمە عەلی باسی لەوەشکرد، بۆشایی ئەمنی لەنێوان حکومەتی عێراق و هەرێمدا هەیە، هۆکارە بۆ ئەوەی کە ئەم جۆرە هێرشانە بێنە کایەوە، دەشڵێت، "لە میحوەرەکەی ئەودا هیچ هەماهەنگییەکی لەگەڵ حکومەتی عێراقیدا نییە". دەشڵێت، "تۆڵەی خۆمان لە داعش دەکەینەوە".

لەبارەی ئاگاداربوونی پێشوەختەیان لەبارەی ئەم هێرشەوە، فەرماندەی میحوەری رۆژئاوای کەرکوکی پێشمەرگە ئەوەشی خستەڕوو، هەمیشە زانیارییان لەبارەی جموجوڵ و چالاکییەکانی داعش لەو ناوچەیە هەبووە، بەڵام پێشبینی ئەم جۆرە لە هێرشییان نەکردووە.

ئەمە لەکاتێکدایە، درەنگانی شەوی رابردوو و کاتژمێر ١٢ و ٣٠ خولەک، چەکدارانی داعش لە سنوری پردێ و لەنزیک گوندی قایەباشی، هێرشیان کردە سەر دوو سەنگەری سەربازی پێشمەرگە و رووبەڕووبوونەوە لەنێوان هێزەکانی پێشمەرگە و چەکدارانی داعشدا دروست بوو، کە تیایدا شەهید و بریندار لە ریزەکانی پێشمەرگەدا کەوتەوە.