سەردێڕ:

لەبارەی هێرشەکانی داعشەوە؛ شەوی رابردوو چی روویدا؟

فۆتۆ: 
2021-05-01

11114 جار خوێندراوەتەوە

درەنگانی شەوی رابردوو و کاتژمێر ١٢ و ٣٠ خولەک، چەکدارانی داعش لە سنوری پردێ و لەنزیک گوندی قایەباشی، هێرشیان کردە سەر دوو سەنگەری سەربازی پێشمەرگە و رووبەڕووبوونەوە لەنێوان هێزەکانی پێشمەرگە و چەکدارانی داعشدا دروست بوو، کە تیایدا شەهید و بریندار لە ریزەکانی پێشمەرگەدا کەوتەوە.


هێرشەکە لە زاری فەرماندەی سەربازیی ناوچەکەوە

لەبارەی هێرشەکەوە، نوری حەمە عەلی فەرماندەی میحوەری رۆژئاوای کەرکوکی پێشمەرگە بەمیدیاکانی سەر بە پارتی راگەیاند، هێرشەکە کاتژمێر ١٢ و ٣٠ خولەکی شەوی رابردوو بووە و چەکدارەکان بە ھاوەن، بیکەیسی و کڵاشینکۆڤ ھێرشیانکردووەتە سەر پێشمەرگە، بەڵام هێرشەکە تێکشکێندراوە و شەڕەکەش، ٤٥ خولەکی خایاندووە.

نوری حەمە عەلی فەرماندەی میحوەری رۆژئاوای کەرکوکی پێشمەرگە ئاماژەی بەوەشکردووە، لەهێرشەکەدا سێ پێشمەرگە شەهید بوون و دوو پێشمەرگەی دیکەش بریندارن، هاوکات لەبارەی ئاماری کوژراو و بریندارەکانی چەکدراەکانی داعشەوە باسی لەوەکرد، "هیچ ئامارێکی کوژراو و بریندارێکیان لەبەردەستدا نییە و تەرمی هیچ چەکدارێکی داعشیان نەکەوتوەتە بەردەست". ئەوەشی وتوە، "چەکدارەکانیش لەو بۆشاییە ئەمنییەوە دزەیان کردووە کە لەنێوان هێزەکانی پێشمەرگە و سوپای عێراقدا هەن". 

فەرماندەی میحوەری رۆژئاوای کەرکوکی پێشمەرگە ئەوەشی خستوەتەڕوو، لەهێرشەکەدا هیچ پێشمەرگەیەک بە دیل نەگیراوە و هێرش کراوەتە سەر دوو سەنگەری پێشمەرگە و بەڵام، لە سەنگەرێکیاندا هیچ کەسێک نەکوژراوە و بریندارنەبووە.

راگەیەندراوی وەزارەتی پێشمەرگە

لەبەرامبەریشدا، وەزارەتی پێشمەرگە ئەوەی خستووەتەڕوو، "لەکاتی راوەدونانیان ژمارەیەکی زۆریان کوژراون و لاشەکانیان جێماون، بەداخەوەش شەھید و بریندار لەڕیزی ھێزی پێشمەرگەدا ھەن".

لەبارەی ئاماری شەهید و بریندارەکانی هێزەکانی پێشمەرگەشەوە، هێرش قادر پەیامنێری ئێن ئاڕتی لە هەولێر باسی لەوەکرد، تا ئێستا سێ پێشمەرگە شەهید بوون و ژمارەیەکی دیکەش برینداربوون.

هاوکات، وەزارەتی پێشمەرگەی حکومەتی ھەرێم لەبارەی ھێرشەکەی شەوی رابردووی داعشەوە راگەیەنراوێکی بڵاوکردەوە و تیایدا دەڵێت، "ھێزی پێشمەرگەی کوردستان بەتوندی بەرپەچی ھێرشەکەی تیرۆریستانی داعشی داوەتەوە و تێکیشکاندوون."

هەر لەبارەی شەڕەکەی پێشمەرگە و داعش لە سنووری پردێشەوە، دژەتیرۆری هەرێمی کوردستان راگەیێندراوێکی بڵاوکردەوە و دەڵێت، پێشمەرگە توانیویانە "هێرشی تیرۆریستان تێکبشکێنن و ئێستا بارودۆخەکە لەژێر کۆنترۆڵی هێزەکانی پێشمەرگەدایە." وەزارەتی پێشمەرگەش دەڵێت، داعش "ژمارەیەکی زۆریان کوژراون."

چی تر روویدا؟

ئومێد محەمەد پەیامنێری ئێن ئاڕتی لەبەغدا، ئاشكرایکرد، کە شەوی رابردوو سەرباری هێرشەکەی داعش بۆ سەر هێزەکانی پێشمەرگە لە سنووری پردێ، گرووپی چەکداری داعش لە سێ قۆڵی جیاوازەوە هێرشی کردوەتە سەر هێزەکانی حکومەتی فیدڕاڵ و پێشمەرگە.

پەیامنێری ئێن ئاڕ تی لەبەغدا ئاماژەی بەوەکردووە، شەوی رابردوو گروپی چەکداری داعش لە سنووری قەزای دوبزەوە هێرشی کردە سەر هێزەکانی پێشمەرگە و، لە سنووری مەتاڕ هێرشی کردوەتە سەر فەوجی سێی سوپای عێراق و، هەروەها لە سنووری ناحیەی ریازی خۆرئاوای کەرکوکیش هێرشی کردوەتە سەر هێزەکانی پۆلیسی فیدڕاڵی. ئەوەشی ووت، "کە سەرجەم هێرشەکانی داعش تێکشکێندراون".

چارەسەر چییە؟ 

نێچیرڤان بارزانی، سەرۆكی هەرێمی كوردستان لە پەیامێکیدا کە لەبارەی هێرشەکانی داعشەوە بۆ سەر هێزەکانی پێشمەرگەوە بڵاویکردەوە، داوا لە حكومەتی فیدرالی و هاوپەیمانی نێودەوڵەتی دژی داعش دەكات هێزێکی هاوبەش لە ناوچە جێناکۆکی لەسەرەکان پێکبهێندرێت بە ئامانجی روبەڕووبوونەوەی داعش لە ناوچەکە.

 

سەرۆكی هەرێمی كوردستان ئاماژەی کردووە، ئێمە چەندین جار حكومەتی فیدرالیی عێراق و هاوپەیمانیی نێودەوڵەتیی دژی داعشمان لە مەترسیی بەهێزبوونەوەی داعش و سوود وەرگرتن لە بۆشاییە ئەمنییەكانی ناوچە ناكۆكی لەسەرەكان ئاگاداركردوەتەوە و هێرشی شەوی رابردووی داعش لەو میحوەرەی پێشمەرگەدا هاوكات بووە لەگەڵ چەند هێرشێكی دیكەی داعش دا.

هۆکاری هێرشەکان

شارەزایانی ئەمنیش، هێرشی ناو بە ناوی چەکدارانی داعش بۆ سەر بنکە و بارەگا سەربازییەکانی هێزەکانی پێشمەرگە و حکومەتی عێراقی، بۆ هەبوونی بۆشایی ئەمنی لەو ناوچانە لەنێوان هەرێم و بەغدا و، رێککنەکەوتنی هەرێم و بەغدا لە هەندێک پرسدا بەتایبەت پرس و دۆسییە ئاسایش و ئەمنییەکان؛ دەگەڕێننەوە.

ئەوەش لە کاتێکدایە، لە بەشێک لە ناوچە کێشە لەسەرەکان بە هۆی نەبوونی هەماهەنگی لە نێوان هێزە ئەمنییەکان و بوونی فرەهێزی لەناوچەکەدا، بووەتە هۆی ئەوەی چەکدارانی داعش چالاکیی و جموجوڵەکانیان زیادبکەن و ئەو بۆشاییە بەکاربێنن و شەوانە هێرشبکەنە سەر گوند و شارۆچکەکانی سنورەکە و لە زۆربەی رووداوەکانیشدا هاوڵاتیان بوونەتە قوربانی.