سەردێڕ:

محەمەد حاجی مەحمود: بێگومان هێزە چەکدارەکانی عێراق بەدەرنین لە هێرشەکەی هەولێر

فۆتۆ: 
2021-04-15

3012 جار خوێندراوەتەوە

محەمەد حاجی مەحمود سکرتێری حزبی سۆسیالست لەسەر هێرشەکەی هەولێر بڵاویکردەوە، "من بەبێ دوو دڵی دەڵێم هێزە چەکدارەکانی عێراقدا بەدەر نییە و من داوا لە دەسەڵاتدارانی هەرێمی کوردستان دەکەم بەبێ شەرمکردن بە رای گشتی و خەڵکی کوردستان بڵێن کە حکومەتی عێراقە دژی کوردن."


ئەوەشی خستووەتەڕوو، "هەوڵ بۆ دروستبوونی ئاژاوە و کێشە لە کوردستان هان دەدرێن، باوەڕناکەم پێکەوە ژیانی هەرێم و بەغدا پێکەوە مابێت بۆیە کورد پێویستی بە چاو خشاندنەوە هەیە لەگەڵ عێراقدا."

ئەمە لەکاتێکدایە، شەوی رابردوو، بە فڕۆکەی بێفڕۆکەوان هێرشکرایە سەر فڕۆکەخانەی نێودەوڵەتی هەولێر وەک باسی لێوەدەکەن، ئامانجی هێرشەکەش بنکەیەکی ھێزەكانی ئەمەریكا بووە.

رۆژی ١٥ی شوباتی ئەمساڵیش، ژمارەیەک موشەک ئاڕاستەی شاری هەولێری پایتەختی هەرێم کران و تیایدا نزیکەی هەشت کەس بریندار بوون و کەسێکیش گیانی لەدەستدا، کە ئەوەش کاردانەوەی ناوخۆیی و نێودەوڵەتی لێکەوتەوە.

رۆژی ١٢ی ئەم مانگەش، ئەنجومەنى ئاسایشى هەرێم دانپێدانانى چەند کەسێکى بڵاوکردەوە و باسی لەوەدەکرد، ئەو کەسانە ئەندامی داعش بوون و بە نیازبوون بە بۆمبى چێنراو و دەمانچەى بێدەنگ لە هەولێر چەند هێرشێک ئەنجامبدەن.

هاوکات، مەسرور بارزانی سەرۆکی حکومەتی هەرێمی کوردستان رایگەیاند، "هێزە ئەمنییەكانمان سەرکەوتووانە پلانێکی تیرۆرستانی داعشیان لە هەولێر پوچه‌ڵكرده‌وه‌، كه‌ له‌ سوریاوه‌ پیلانەکە رێکخراوه‌ و ئاڕاستەکراوه."

مەسرور بارزانی باسی لەوەشکردبوو، "داوا لە هاوپەیمانان و هاوبەشەکانمان دەکەم کە مەترسییەکانی ئەم هەڕەشەیە بۆ سەر ئاشتی و سەقامگیریی ھەرێمی کوردستان و دەرەوە  بە ھەند وەربگرن."