سەردێڕ:

ئەمریکا: لە هێرشەکانی سەر هەرێم توڕەین

فۆتۆ: 
2021-04-15

2177 جار خوێندراوەتەوە

وتەبێژی وەزارەتی دەرەوەی ئەمریکا لەبارەی هێرشەکەی سەر هەولێر پەیامێکی بڵاوکردەوە و تیایدا هاتووە، هێرشەکانی سەر هەرێم توڕەیی کردوون.


نێد پرایس وتەبێژی وەزارەتی دەرەوەی ئەمریکا لە تویتێکدا ئاشکرای کرد، "هێرشەکانی سەر هەرێمی کوردستانی عێراق ئێمەی تووڕە کردووە".

دەشڵێت، دەمێکە گەلی عێراق بەدەست ئەمجۆرە توندوتیژییە و پێشێلکردنی سەروەرییەکەیەوە دەناڵێنێت.

ئەمە لەکاتێکدایە، شەوی رابردوو ١٤ی ٤ی ٢٠٢١ لەرێگەی فرۆکەی بێ فڕۆکەوانەوە بە TNT هێرشکرایە سەر بنکەی سەربازی هێزەکانی هاوپەیمانان لە ناو فڕۆکەخانەی نێودەوڵەتی هەولێر، هاوکات، هیچ زیانێکی گیانی لێنەکەوتەوە و زیانی مادی بەباڵەخانەکە گەیاند.

رۆژی ١٥ی شوباتی ئەمساڵیش، ژمارەیەک موشەک ئاڕاستەی شاری هەولێری پایتەختی هەرێم کران و تیایدا نزیکەی هەشت کەس بریندار بوون و کەسێکیش گیانی لەدەستدا، کە ئەوەش کاردانەوەی ناوخۆیی و نێودەوڵەتی لێکەوتەوە.

رۆژی ١٢ی ئەم مانگەش، ئەنجومەنى ئاسایشى هەرێم دانپێدانانى چەند کەسێکى بڵاوکردەوە و باسی لەوەدەکرد، ئەو کەسانە ئەندامی داعش بوون و بە نیازبوون بە بۆمبى چێنراو و دەمانچەى بێدەنگ لە هەولێر چەند هێرشێک ئەنجامبدەن.

هاوکات، مەسرور بارزانی سەرۆکی حکومەتی هەرێمی کوردستان رایگەیاند، "هێزە ئەمنییەكانمان سەرکەوتووانە پلانێکی تیرۆرستانی داعشیان لە هەولێر پوچه‌ڵكرده‌وه‌، كه‌ له‌ سوریاوه‌ پیلانەکە رێکخراوه‌ و ئاڕاستەکراوه."

مەسرور بارزانی باسی لەوەشکردبوو، "داوا لە هاوپەیمانان و هاوبەشەکانمان دەکەم کە مەترسییەکانی ئەم هەڕەشەیە بۆ سەر ئاشتی و سەقامگیریی ھەرێمی کوردستان و دەرەوە  بە ھەند وەربگرن."