سەردێڕ:

فراکسیۆنی یەکێتی: کەس پەلاماری پەرلەمانتارەکەی گۆڕانی نەداوە

فۆتۆ: 
2021-03-17

20844 جار خوێندراوەتەوە

فراکسیۆنی یەکێتی لە پەرلەمانی کوردستان لەبارەی شەڕ و گرژییەکانی دوێنێوە هەڵوێستی خۆی رایگەیاند و لە راگەیەنراوێکدا دەڵێت، "پەرلەمانتارێكی فراكسیۆنی گۆڕان كە پێشتر پلانیان بۆ داڕشتبوو، لە بری پێشنیاز بۆ خزمەتكردنی هەڵەبجە و سەركۆنەی رژێمی بەعس پەلاماری رابەر و رەمزی گەورەی گەلەکەمان سەرۆک مام جەلال سیمبولی ئازادی و شۆڕش و قوربانیدانی دا."


ئەوەشی خستووەتەڕوو، "‏ئێمە پێشتر ئاگاداری ئەو هەنگاوەبووین و فراكسیۆنەكەیانمان ئاگاداركردەوە، بەڵام ئەوان هەرسوور بوون لەسەر ئەو چەواشەكاریانە بۆیە ئێمەش هەوڵی راگرتنی ئەو چەواشەكاریانەماندا."

فراکسیۆنی یەکێتی دەشڵێت، "هەوڵی خۆ بە پاڵەوانکردن و موزایەدەی فەسبووکچییەکان گەیشتووە بە ئاستێک کە هیچ ئەدەبیاتێکی سیاسی تێدا رەچاو ناکرێت."

ئاماژەی بەوەشکردووە، "هەموو لایەک دڵنیا دەکەینەوە، کە هیچ کەسێک پەلاماری ئەو پەرلەمانتارەی نەداوە و گرتە ڤیدیۆکانیش شایەتی وتەکانمانن."

دوێنێ، پەرلەمانی کوردستان لە ساڵرۆژی کیمیابارانکردنی هەڵەبجەدا، لەسەر رەوشی ئەو شارە کۆبووەوە و تیایدا شیرین ئەمینی پەرلەمانتاری گۆڕان باسی لەوەکردبوو، کە "ئەو فڕۆکەوانەی کیمیابارانی ھەڵەبجەی کردووە لەلایەن جەلال تاڵەبانییەوە ئازادکراوە"، دواتر گرژی دروستبووە و لەلایەن فراکسیۆنی یەکێتیەوە وەڵام دراوەتەوە و بەھۆیەوە گرژی دروستبوو و دواتریش بۆ ماوەی نیو کاتژمێر کۆبوونەوەکە راگیرا.

شیرین ئەمین ئەندامی پەرلەمانی كوردستانە لە فراكسیۆنی گۆڕان، کە دوای رووداوەکەش لەلاپەڕەی فەرمی فەیسبوكی خۆی وێنەیەكی تارق رەمەزان فڕۆكەوانی یەكێک لەو فڕۆكانەی هەڵەبجەی كیمیابارنكرد داناوە و لەسەری نووسیوە، دوای ئەوەی ئەم وێنەیەی فڕۆکەوانە دەربازبووەکەی کیمابارانی هەڵەبجەم بەرزکردەوە لە ناو هۆڵی پەرلەمان ئێستا ناهێڵن داخلی هۆڵی پەرلەمان بم لە لایەن پۆلیسەکانەوە.

 

دەقی راگەیەنراوەکەی فراکسیۆنی یەکێتی:

لە دانیشتنی تایبەت بە یادی سی وسێ ساڵە كیمیابارانی هەڵەبجە لە پەرلەمانی كوردستان، ئێمە تەركیزمان لەسەر قوربانیانی هەڵەبجەو هەنگاوەكانی خزمەتكردنی ئەو شارە زوڵملێكراوە، بەڵام پەرلەمانتارێكی فراكسیۆنی گۆڕان كە پێشتر پلانیان بۆ داڕشتبوو، لە بری پێشنیاز بۆ خزمەتكردنی شارەكەو سەركۆنەی رژێمی بەعس، پەلاماری ڕابەر و رەمزی گەورەی گەلەکەمان سەرۆک مام جەلال سیمبولی ئازادی و شۆڕش و قوربانیدانی دا. ‏ئێمە پێشتر ئاگاداری ئەو هەنگاوەبووین و فراكسیۆنەكەیانمان ئاگاداركردەوە، بەڵام ئەوان هەرسوور بوون لەسەر ئەو چەواشەكاریانە، بۆیە ئێمەش هەوڵی راگرتنی ئەو چەواشەكاریانەماندا، هەرگیز ئەندامانی فراکسیۆنی سەوز نە پەلاماری پەرلەمانتارەكەیان داوەو نە هێرشیاركردووەتە سەری.

بێگومان هەوڵی خۆ بە پاڵەوانکردن و موزایەدەی فەسبووکچییەکان گەیشتووە بە ئاستێک کە هیچ ئەدەبیاتێکی سیاسی تێدا ڕەچاو ناکرێت؛ هاوکات ئێمە لەوە تێدەگەین کە گەلی عێڕاق لە هەڵبژاردنی پێشوەختە نزیک دەبێتەوە و ئەم خۆ بەپاڵەوانکردنانەش ئامانجەکەی ڕوونە. دووبارە هەموو لایەک دڵنیا دەکەینەوە کە هیچ کەسێک پەلاماری ئەو پەرلەمانتارەی نەداوە ،گرتە ڤیدیۆکانیش شایەتی وتەکانمانن.

لێرەوە رایدەگەیەنین هەموو ئەندامانی فراکسیۆنەکەمان هاوهەڵوێستن لەسەر ڕاگرتنی بێڕێزیکردن بە شکۆی گەلانی عێراق جەنابی سەرۆک مام جەلال، وە هەر ناو هێنان و دیمەنێکیش دەلالەتە لە هەموو فراکسیۆنی یەکێتی نیشتیمانی کوردستان. ‏بۆ راگرتنی پێشویەكان لەناو هۆڵی پەرلەمان بەڕێز سەرۆكی پەرلەمان لە چوارچێوەی پەیرەوی ناوخۆی پەرلەمان رێكاری گرتووتە بەرو بۆ ئەو كاتە رێگری لێكراوە بێتەوە ناو ئەو دانیشتنەی پەرلەمانەوە. ‏بۆیە ئەم ڕەفتارە نامەسئولانە هیج خزمەتێک بە پرسی هەڵەبجە و قوربانیان ئەو مەرگەساتە ناکات.