سەردێڕ:

پارێزگاری سلێمانی: بۆ نەورۆز نە کەرەتینە رادەگەیەنرێت نە قەدەغەی هاتوچۆ

فۆتۆ: 
2021-03-17

21200 جار خوێندراوەتەوە

هەڤاڵ ئەبوبەکر پارێزگاری سلێمانی بە ئێن ئاڕ تی راگەیاند، "پەیوەست بە پارێزگاکەمانەوە هەموو خەڵک دڵنیا دەکەینەوە بەمشێوازەی، کە ئێستا هەیە پابەندبن نە کەرەتینە رادەگەیەنرێت و نە قەدەغەی هاتوچۆ رادەگەیەنرێت."


لەبارەی ئاهەنگگێڕان لە شەقامە گشتییەکانیش ئەوەی خستەڕوو، "ئەمانەش رێکدەخرێن لیژنەی باڵای ئۆپراسیۆنەکانی پارێزگای سلێمانی بۆ بەرەنگاربوونەوەی کۆرۆنا و لایەنە پەیوەندیدارەکان و لیژنەی ئارامی پاریزگای سلێمانی لە دیوانی پاریزگا کۆدەبنەوە بۆ دانانی رێکاری پێویست بۆ رێکخستنی هەموو ئەو چالاکیانەی کە بەڕێوەدەچن."

ئاماژەی بەوەشکردووە، "شەقامە گشتییەکان بەشێوەیەکی سروشتی لەبەر ئەوەی لە ژینگەیەکی کراوەدایە بەو مەرجەی کە هاوڵاتیان دووربن لە یەک و بەریەککەوتن نەبێت، لە  هەمووی گرنگتر ماسک ببەستنە بۆ ئەوەی کە بتوانیین هیچ نەبێت ئەو پەیوەندیەی کە کۆرۆنا وایکرد لە یەک داببڕێن، بۆنەیەکی وەکو نەورۆز وایلێبکات کە پەیوەندیەکان بەهێز بکەینەوە بەو مەرجەی زیان نەگەیەنێت بە تەندروستی گشتی."

لە ١٠ی ئەم مانگەشدا، وتەبێژی حکومەتی هەرێم رایگەیاند، هیچ بڕیارێک نییە بۆ راگەیاندنی قەدەغەی هاتوچۆ لە رۆژانی نەورۆزدا، وتیشی، "پێموایە بەر لە نەورۆز کۆبوونەوەیەکی تر دەکرێت و ئەگەر بزانین دۆخەکە خراپە، ئەوا بڕیاری دیکە دەدەین."