سەردێڕ:

رۆژنامەیەکی ئەمریکی: بایدن بڕیارێکی بۆ هێرشکردنە سەر گروپە چەکدارە شیعەکان راگرتووە

فۆتۆ: 
2021-03-05

7955 جار خوێندراوەتەوە

رۆژنامەی "وۆڵ ستریت جۆرناڵ"ی ئەمریکی بڵاویکردەوە، دوای ئەنجامدانی هێرشی یەکەمی شەوی ٢٦ی مانگی رابردوو، جۆ بایدن بڕیاری ئەنجامدانی هێرشی دووەمی هەڵوەشاندووەتەوە، ئەمەش بەهۆی ئەوەی لەو ناوچەیەدا ژمارەیەک ژن و منداڵی تێدابووە.


ئەو رۆژنامە ئەمریکییە لە راپۆرتێکدا باسی لەوەکردووە، لە بەرەبەیانی رۆژی ٢٥ی شوباتدا بایدن و بەرپرسە باڵاکانی وەزارەتی بەرگری ئەمریکا کۆبوونەتەوە بۆ بڕیاردان لەسەر شێوازی چۆنییەتی وەڵامدانەوەی هێرشەکانی سەر هەولێر و تیایدا دوو ئامانج دیاریکراە، هاوکات دوای ئەوەی ئامانجی یەکەم لەشەوی ٢٦ی شوبات جێبەجێکرا، بۆ هێرشی دووەم و پێش نیو کاتژمێر لە جێبەجێکردنی هێرشەکە، بایدن بڕیاریداوە کە هێرشی دووەم رابگیرێت.

رۆژنامەی "وۆڵ ستریت جۆرناڵ" لە زاری بەرپرسە باڵاکانی کۆشکی سپییەوە ئاماژەی بەوەشکردووە، دوای ئەنجامدانی هێرشی یەکەم، لەکاتێکدا فڕۆکەی F-15Es لە ئاسماندا بووە و ئەو زانیارییە بە بەرپرسە باڵاکانی وەزارەتی بەرگری گەیشتووە کە کۆمەڵێک ژن و منداڵ دەکەونە ئەو ناوچەیەی بەنیازن بیکەنە ئامانجی دووەم، هەر بۆیە جاک سوڵیڤان راوێژکاری ئاسایشی نیشتیمانی ئەمریکا دەستبەجێ زانیارییەکەی بە جۆ بایدن گەیاندووە و، پێش نیو کاتژمێر لە ئەنجامدانی هێرشی دووەم، بڕیاری هەڵوەشاندنەوەی هێرشەکەی بۆ سەر ئەو گروپە چەکدارییە داوە.

لە پاش ئەو هێرشەی ئەمریکا کە لە خاکی سوریادا کردیە سەر گروپێکی چەکداریی شیعە، رۆژی ٣ی ئەم مانگە ١٠ موشه‌ک ئاراسته‌ی بنكه‌ی سه‌ربازی عه‌ین ئه‌سه‌د له‌ پارێزگای ئه‌نباری رۆژئاوای عێراق كرا، کە به‌ دووه‌م گه‌وره‌ترین سه‌ربازگه‌ له‌ دوای بنكه‌ی سه‌ربازی به‌له‌د له‌ عێراق داده‌نرێت، ده‌كه‌وێته‌ ناوچه‌ی به‌غدادی له‌ پارێزگای ئه‌نبار و نزیک رووباری فورات، له‌ ئێستاشدا هێزه‌كانی هاوپه‌یمانی نێوده‌وڵه‌تی دژ به ‌داعشی تێدا جێگیركراوە.

شەوی ١٥ی مانگی رابردوو، کاتژمێر ٩:٣٠ هێرشێکی موشەکی کرایە سەر شاری هەولێر و بووە هۆی گیانلەدەستدانی دوو کەس و برینداربوونی حەوت کەسی دیکە کە یەکێکیان ئەمریکییە.