سەردێڕ:

هۆشیار عەبدوڵا: هەڵوەشاندنەوەی کابینەی نۆیەم ئەرکێکی نیشتیمانییە

فۆتۆ: 
2021-02-24

5336 جار خوێندراوەتەوە

پەرلەمانتارێکى کورد لە پەرلەمانى عێراق لە تویتەر رایگەیاند، ئەجێندا ئەمنییەکانی کابینەی نۆ تادێ مەترسیی زیاتر لەسەر ئێستا و ئایندەی هەرێم دروست دەکەن، دەشڵێت، "هەڵوەشاندنەوەی کابینەی نۆیەم ئەرکێکی نیشتیمانییە."


هۆشیار عەبدوڵا ئەندامی پەرلەمانی عێراق و ئەندامی لیژنەی دارایی پەرلەمان لە تویتەر نوسیەیەتی، "‏لەپاڵ شکستە ئیداریی و داراییەکانی ئەم کابینیەی حکومەتی هەرێم، بەتایبەتی بێتوانایی و بێباکیی لە دابینکردن و لێبرینی موچەی موچەخۆران، ئەجێندا ئەمنییەکانی کابینەی نۆ تادێ مەترسیی زیاتر لەسەر ئێستا و ئایندەی هەرێم دروست دەکەن".

راشیگەیاند، ''ئەم کابینە ئەمنیە فاشیلە دارشەقەکانیی یەکێتی و گۆڕانن، یەکێتی بە پلەی یەکەم و گۆڕان بە پلەی دوەم تاوانبارن بەوەی درێژە بە تەمەنی حوکمڕانیەک دەدەن کە کەرامەتی مرۆڤی لە هەرێمەکەدا خستووەتە مەترسیەوە."

ئاماژەی بەوەشداوە، هەر تاوانێک پارتی بەناوی حکومەتەوە بیکا، یەکێتی و گۆڕان شەریک و بەشدارن لەگەڵیدا.

ئەوەش لە کاتێکدایە، هاوڵاتیان بە گشتی گرفتی نەبوونی هەلی کار و دامەزراندن و خزمەتگوزارییەکانیان هەیە و ئەوەش سەرەڕای دواکەوتن و پێنەدانی موچە و لێبڕینی موچە، لە سەرەتای دەستبەکاربوونی ئەم کابینەیەشەوە بەرپرسانی کابینەکە دروشمی چاکسازیان کردووەتە بەرنامەی کار و بانگەشەی بۆ دەکەن.