سەردێڕ:

تورکیا کوژرانی هەشت گەریلای پەکەکەی لە هەرێم راگەیاند

فۆتۆ: 
2021-02-23

3366 جار خوێندراوەتەوە

وەزارەتی بەرگری تورکیا رایگەیاند، لەهێرشێکی ئاسمانیدا هەشت گەریلای پەکەکەیان لە هەرێمی کوردستان کوشتووە.


ئەمڕۆ سێشەممە، وەزارەتی بەرگری تورکیا لە راگەیەندراوێدا باسی لەوەکردووە، لە هێرشێکی فڕۆکەجەنگییەکانیاندا بۆسەر بارەگاکانی پەکەکە لە چیاکانی هەرێمی کوردستان، هەشت چەکداری سەر بەو رێکخراوە کوژراون و لە راگەیەندراوەکەشدا هاتووە، کە بەردەوام دەبن لەهێرشەکانیان بۆ سەر پەکەکە.

دوێنی دووشەممە، ناوەندی راگەیاندن و چاپەمەنیی هێزەكانی پاراستنی گەل (هەپەگە) بە ئێن ئاڕ تی راگەیاند، لەئۆپەراسیۆنەکەی چیای گارەدا ١٤ گەریلا گیانی لەدەستداوە، پێشتریش ميدياکانی نزیک لە پەکەکە بڵاویانکردبووەوە، لە روبەڕوبوونەوەکانی چيای گارەدا لانيکەم ‏نۆ سەربازی تورکیا کوژراون و ژمارەی بريندارەکانیشیان زياترە لەو ژمارەيەی وەزارەتی ‏بەرگری ئەو وڵاتە بڵاویدەکاتەوە.

سوپای تورکیا، ئۆپەراسیۆنی "چنگی هەڵۆی ٢" رۆژی ١٠ی ئەم مانگە بۆ سەر چیای گارەی سەر بە قەزای ئامێدی لەهەرێمی کوردستان بۆ سەر بارەگاکانی پارتی کرێکارانی کوردستان (پەکەکە) دەستپێکرد، کە تیایدا دوو هەزار و ٢١٨ سەرباز و ٤٠ فڕۆکەی جەنگی و فڕۆکەی ‏بێ فڕۆکەوان بەشداری ئۆپراسیۆنەکەیان کرد و بۆ ماوەی چوار رۆژ بەردەوام بوو.