سەردێڕ:

مەسرور بارزانی دوای هێرشەکەی ناوچەی سەوز: دەبێت ئەو هێرشانە رابگیرێن

ئیدانەی هێرشەکەی ناوچەی سەوزی بەغدا دەکات
فۆتۆ: 
2021-02-23

14862 جار خوێندراوەتەوە

سەرۆکی حکومەتی هەرێمی کوردستان ئیدانەی هێرشەکەی ناوچەی سەوزی بەغدا دەکات و دەڵێت، "دەبێت ئەو هێرشانە رابگیرێن."


مەسرور بارزانی سەرۆکی حکومەتی هەرێمی کوردستان لە تویتێکدا لەبارەی هێرشەکەی شەوی رابردووی ناوچەی سەوزی بەغدای پایتەختی عێراقەوە ئەوەی خستووەتەڕوو، "نێردە دیبلۆماسییەکان دووچاری مەترسی گەورە دەبنەوە لە عێراق و ئەوان بۆ جەنگی دژ بە تیرۆر و دووبارە بونیادنانەوەی عێراق لێرەن".

مەسرور بارزانی دەشڵێت، "داوا لە حکومەتی فیدراڵ دەکەم رێکاری کردەیی بۆ دابینکردنی سەلامەتییان بگرێتەبەر و دەبێت ئەو هێرشانە رابگیرێن."

ئەوەش لەکاتێکدایە، لە ماوەی رابردوودا، چەندجارێک موشەکی جۆراوجۆر ئاڕاستەی ناوچەی سەوزی بەغداکراوە و شەوی رابردووش، بەپێی راگەیەنراوی شانەی ئەمنی عێراق، دوو موشەک لە ناوچەی سەوزی بەغدا كەوتوونەتە خوارەوە، بەبێ ئەوەی ھیچ قوربانییەکی لێبکەوێتەوە.

 

شەوى دووشەممەی هەفتەی رابردووش، ژمارەیەک موشەک ئاڕاستەى هەولێری پایتەختی ھەرێم کران و بەهۆیانەوە بەڵێندەرێکى هاوپەیمانان کوژرا و چەند کەسى دیکەش برینداربوون کە بەشێکیان ئەمریکی بوون، ھاوکات، دوێنێش یەکێک لە بریندارەکان گیانی لەدەستدا.