سەردێڕ:

رەشنوسی بودجەی فیدراڵی رادەستی سەرۆکایەتی پەرلەمانی عێراق کرا

فۆتۆ: 
2021-02-22

7188 جار خوێندراوەتەوە

چاوگێک لە پەرلەمانی عێراق رایگەیاند، لیژنەی دارایی پەرلەمان رەشنوسی پڕۆژەیاسای بودجەی فیدراڵی ٢٠٢١ی، بەبێ رێککەوتن لەگەڵ هەرێم، رادەستی سەرۆکایەتی پەرلەمان کردووە.


ئەو چاوگە بۆ ئێن ئاڕ تی ئاشکرایکرد، لیژنەی دارایی رەشنوسی کۆتایی پڕۆژەیاسای ٢٠٢١ی رادەستی سەرۆکایەتی پەرلەمان کردووە.

راشیگەیاند، رادەستکردنەکە بە ئامانجی دەستنیشانکردنی وادەیەکە بۆ دەنگدان لە سەر بودجە، لەکاتێکدا ئەو بڕگەیەی پەیوەندی بە پشکی هەرێمەوە هەیە یەکلایینەکراوەتەوە.

هاوکات، بڕیارە ئەمڕۆ بە مەبەستی گفتوگۆكردن و بۆ گەیشتن بە رێككەوتن لەسەر پرۆژەیاسای بودجەی ٢٠٢١ی عێراق و پشكی هەرێم لە پرۆژەیاساكەدا بۆ ١٦یەم جار شاندى هەرێم  بە سەرۆکایەتی قوباد تاڵەبانی جێگری سەرۆکی حکومەتی هەرێم بگەڕێتەوە بەغدا.

ئەمە لەکاتێکدایە، پێشتر چەندین جار پەرلەمانتارانی عێراق لە لیژنەی دارایی ئەوەیان ئاشکراکردبوو، کە ئەگەر هەیە بێ گەیشتن بە هیچ رێککەوتنێک لەگەڵ هەرێم لەم هەفتەیەدا پەرلەمان دەنگ لەسەر بودجە بدات.