سەردێڕ:

چاودێریی کۆمەڵایەتی: لە ساڵی رابردوودا لە هەولێر ٣٠٤ ژن هەڕەشەیان لێکراوە

فۆتۆ: 
2021-02-20

1410 جار خوێندراوەتەوە

بەڕێوەبەری گشتی چاودێری و گەشەپێدانی كۆمەڵایەتی هەولێر لە كۆنگرەیەكی ڕۆژنامەوانیدا ئاماری ساڵانەی كارو چالاكییەكانی بۆ میداكان خستەڕوو.هاوکات، رایگەیاند، " لە ساڵی ٢٠٢٠ لە سنووری پارێزگای هەولێر ٣٠٤ ژن هانایان بۆ ماڵی ئافرەتانی هەڕەشەلێكراو هێناوە و لەو ژمارەیە تەنها ٤١ ژن لە ماڵەكەدا ماون."


ئەمڕۆ شەممە، یوسف چاوشین بەڕێوەبەری گشتی چاودێری و گەشەپێدانی كۆمەڵایەتی هەولێر لە کۆنفرانسێکی رۆژنامەوانیدا رایگەیاند، لە ساڵی ٢٠٢٠  لە خانەی باساڵاچوان ١٩٠ بەساڵاچوولەو خانەیەبوون و لەو ژمارەیەش تەنها ٦٧ بەساڵاچوو ماونەتەوە، لەو ژمارەیەش ٢٦ بەساڵاچوو ژن بوون و ٤١ بەساڵاچوی دیکەشیان پیاوبوون.

راشیگەیاند، لە خانەی نەوجەوانانی كوڕان و كچان ٥٩ منداڵ بوونیان هەبووە، لەو ژمارەیە  ٣٢ منداڵیان کوڕ و ٢٧ دیکەیان كچ بوون.

ئەوەشی خستەڕوو، ژمارەی ئەو منداڵانەی لە دەرەوەی خانەبوون بریتیە لە ٢١٠ منداڵ.

هاوکات، ئاماژەی بەوەشدا، حكوومەتی هەرێمی كوردستان بڕی ٥٤٠ ملیۆن دیناری بۆ منداڵانی كچان و كوڕانی خانەكان و بەساڵاچووان و خۆراك و پێداویستییەكان خەرج كردووە.

باسی لەوەشکرد، لە ساڵی ٢٠٢٠ لە سنووری پارێزگای هەولێر هەزار و ٣١٨ منداڵ پەیوەندییان بەهێلی ١١٦ تایبەت بە منداڵان كردووە كە زۆرترینیان كێشەی قوتابخانەیان هەبووە لەو ژمارە پەیوەندی كردنەش تەنها ٥٠٠ پەیوەندییان ڕاستەقینە بوون.

دەشڵێت، لە سنووری پارێزگای هەولێر ١٠٢ دایەنگەبوونیان هەیەکە  سێ لەوان حكوومین و ٩٩ دیکەیان ناحكوومین. هاوکات، ئەوەشی خستەڕوو، کە ژمارەی منداڵانی سوودمەند بریتین لە ٨٤٧ منداڵ، بەڵام پێش بڵاوبوونەوەی ڤایرۆسی كۆرۆنا دوو هەزار و ٨٩٣ منداڵ سوودمەند بوون.

لەبارەی هاوكارییەكانی حكوومەتی هەرێمی كوردستان لە سنووری پارێزگاری هەولێر بەڕێوەبەری گشتی ئاشکرای کرد، چوار جۆر هاوكاری دابەشكراوە کە بریتین لە خۆراك بە بڕی چوار هەزار و٦٠٠ تەن خۆراك بەسەر ٧٠ هەزار خێزان دابەشكراوە، لە قۆناغی دووەم بڕی پێنج هەزار و ٦٨٧ تەن خۆراك بەسەر ١٠٧ هەزار خێزاندا دابەشكراوە و لە قۆناغی سێیەم بڕی چوار ملیار و ٩٠٠ ملیۆن دینار بەسەر ٤٩ هەزار خێزان دابەشكراوە، بەڵام قۆناغی چوارەم تایبەت بە دابەشكردنی نەوت بووە کە تیایدا بڕی شەش ملیۆن و ٦٤٠ هەزار لیتر نەوتی خێرخوازی بەسەر ٣٣ هەزار و ٢٠٠ خێزان دابەشكراوە.