سەردێڕ:

پارێزگاری هەولێر لە یەکەم پەیامیدا داوایەک لە هاوڵاتیان دەکات

فۆتۆ: 
2021-02-20

23179 جار خوێندراوەتەوە

ئومێد خۆشناو لە یەکەم پەیامی دوای دەستبەکاربوونی وەکو پارێزگاری هەولێر رایگەیاند، داوا لە هەموو لایەک دەکات بەهۆی کۆرۆنا و رێکارە تەندروستییەکانەوە سەردانی نەکەن.


پارێزگاری هەولێر ئاماژەی بەوەشکردووە، لەبری سەردانکردن  بۆ پیرۆزبایی، با ئەو کەس و لایەنانەی ویستی سەردانیان هەیە فاتیحایەک بۆ فرسەت سۆفی، پارێزگاری کۆچکردووی شارەکە بنێرن.

دەشڵێت، "لەبری ئەزیەت کێشانتان، نزای سەرکەوتن و پشتیوانی ئەرکەکەمان بن و لە پێگە و شوێنی خۆتانەوە لەجیاتی پیرۆزبایی، خەریکی راییکردنی مامەڵە و کاروباری هاوڵاتییان بن، سوپاستان دەکەین".

رۆژی ٨ی ئەم مانگە، پرۆسەی دەنگدان بۆ پارێزگاری نوێی هەولێر لە ئەنجومەنی پارێزگای شارەکەدا بەڕێوەچوو و تیایدا، ئومێد خۆشناو بە ١٨ دەنگ لە کۆی ٢٣ دەنگ وەکو پارێزگاری هەولێر دیاریکرا.

رۆژی پێنجشەممە، ١٨ی ئەم مانگە نێچیرڤان بارزانى، سەرۆکى هەرێمى کوردستان، فەرمانى هەرێمى بۆ دەستبەکاربوونى ئومێد خۆشناو وەک پارێزگارى نوێی هەولێر واژۆکرد.

رۆژی ١٨ی مانگی ١١، فرسەت سۆفی پارێزگاری هەولێر دوای ماوەیەک لە توشبوونی بە کۆرۆنا و بردنەدەرەوەی بۆ چارەسەر، لە شاری ئەنقەرەی وڵاتی تورکیا لە تەمەنی ٤٢ ساڵیدا کۆچی دواییکرد.