سەردێڕ:

ئەمریکا: هێرشە موشەکییەکەی هەولێر دەریخست پێویستە لە کارەکانمان بەردەوامبین

فۆتۆ: 
2021-02-19

851 جار خوێندراوەتەوە

وەزیری بەرگریی ئەمریکا رایگەیاند، ئەو هێرشە موشەکییەی کرایە سەر هەولێر ئەوەی دەرخست، کە دەبێت درێژە بە کارەکانیان بدەن و بەردەوامبن لە ناوچەکەدا.


لۆید ئۆستن وەزیری بەرگریی ئەمریکا لە کۆبوونەوەی لەگەڵ وەزیرانی بەرگریی وڵاتانی ئەندام لە هاوپەیمانی ناتۆ، جەختی لە پابەندبوونی ئەمریکا بە لەناوبردنی داعش و رێزگرتن لە سەروەریی خاکی عێراق و سەقامگیریی درێژخایەنی ناوچەکە کردەوە.

ئۆستن بە وەزیرانی بەرگریی وڵاتانی ئەندامی ناتۆی وتووە، هێرشە موشەکییەکەی سەر هەولێر دەرخەری گرنگیی بەردەوامبوونی کارەکانی ئەمریکایە لە ناوچەکەدا.

هاوکات وەزیری بەرگریی ئەمریکا پێشوازی لە بڕیاری ناتۆ کردووە بۆ فراوانکردنی چالاکییەکانی لە عێراق و پێویستی بوونی توانای سەربازی و هێزی ئامادەکراو کردووەتەوە بۆ پاڵپشتیکردنی ئۆپراسیۆنە بەردەوامەکانی ناتۆ.

 

ئەوەش لەکاتێکدایە، لە چەند رۆژی رابردوودا، بە موشەک هێرشکرایە سەر هەولێری پایتەختی هەرێمی کوردستان و دواتر گروپی 'سرایا أولیاء الدم' ئەنجامدانی هێرشەکەی گرتە ئەستۆ و رایانگەیاندبوو، "سەرجەم هاوڵاتیان و سەربازیی گەلى کورد برا و خۆشەویستمانن، جگە لە بنکە سەربازییەکانی داگیرکەران هیچ شتێکى تر ناکەینە ئامانج."