سەردێڕ:

ئێران هێڵێکی ئاوی بۆ بازرگانی لەگەڵ سوریا دەکاتەوە

فۆتۆ: 
2021-02-14

2002 جار خوێندراوەتەوە

سەرۆکی ژووری بازرگانی ئێران - سوریا رایگەیاند، بەهۆی نەبوونی سنورێکی وشکانی هاوبەش لەگەڵ سوریادا و بەکارهێنانی خاکی عێراق، وڵاتەکەی لە ئاڵوگۆڕی بازرگانیدا لەگەڵ دیمەشق روبەڕوی چەند ئاستەنگێک بووەتەوە.


کەیوان کاشفی، سەرۆکی ژووری بازرگانی ئێران - سوریا بە ئاژانسی فارسی راگەیاندووە، نەبوونی سنوری وشکانی هاوبەش لەگەڵ سوریادا گرفتی ئاڵوگۆڕی بازرگانی بۆ دروستکردوون.

ئاماژەی بەوەشدا، لە ژووری بازرگانیدا لە رێگەی لیژنەی پەرەپێدانی پەیوەندییە ئابورییەکان ئێران - عێراق و رێکخراوی دەریایی ئێران بڕیاریانداوە بە دروستکردنی ‌هێڵێکی ئاوی لەگەڵ سوریادا.

ئاشکراشیکرد، هێڵەکە لەنێوان بەندەرعەباس و لازقییە دروستدەکرێت و کەشتییە بارهەڵگرەکان هاتوچۆی بازرگانی دەکەن لەو هێڵەدا.

کاشفی راشیگەیاند، لە ١٠ مانگی داهاتوودا یەکەمین کەشتی بازرگانی لە بەندەر عەباسەوە بەرەو لازقییە دەکەوێتەڕێ و هەموو ١٥ رۆژ جارێك هاتوچۆ دەکرێت.

بەپێی زانیارییەکان، سێ رێگا هەیە بۆ ئاڵوگۆڕی بازرگانی نێوان ئێران و سوریادا، یەکێکیان لە رێگەی وشکانییەوە لە رێگەی بەکارهێنانی خاکی عێراق، دووەمیان ئەو رێگا نوێیەکە لە بەندەر عەباسەوە بۆ لازقییە، سێیەمیان لە رێگەی بەندەری مێرسینی تورکیاوە.

 

لەلایەکی دیکەوە، ماڵپەڕی شەرقولئەوسەت بڵاویکردەوە، ئەو رێگا نوێیەی کە پلانی بۆ دانراوە ئاستەنگی زۆری هەیە لەوانەش زۆری ماوەی نێوان دوو بەندەرەکە و هاتوچۆ ئاسان نابێت، بەڵام ئێران هیچ روونکردنەوەیەکی سەبارەت بە رێگای ئاوی لەگەڵ سوریا نەخستووەتەڕوو.