سەردێڕ:

هادى عامرى: تورکیا هێرش دەکاتە سەر چیاى شنگال

فۆتۆ: 
2021-02-13

13023 جار خوێندراوەتەوە

سەرۆکى هاوپەیمانى فەتح رایگەیاند، زانیاریى باوەڕپێکراو هەیە کە تورکیا نیازى ئەوەى هەیە هێرش بکاتە سەر چیاى شنگال، داواش لە حکومەت دەکات رێوشوێنى پێویست بگرێتەبەر.


هادى عامرى سەرۆکى هاوپەیمانى فەتح بڵاویکردووەتەوە، "زانیارى هەواڵگرى دڵنیا هەیە کە سوپاى تورکیا نیازى ئەوەى هەیە هێرش بکاتە سەر چیاى شنگال."

باسى لەوەشکردووە، پێویستە حکومەتى تورکیا کۆتایى بەو هەڵسوکەوتە دوژمنکارانەیەى بهێنێت، چونکە خزمەتى بەرژەوەندییەکانى هەردوو وڵات ناکات، بەڵکو کاریگەریى سلبى گەورە لەسەر پەیوەندییە نێودەوڵەتییەکان دادەنێت.   

هادى عامرى دەشڵێت، "پێشبینى ئەوەمان دەکرد تورکیا بە تەواوەتى لە خاکى عێڕاق بکشێتەوە، نەک داگیرکارى زیاتر ئەنجام بدات."

عامری داواش لە حکومەتى عێراق دەکات، "سەرجەم رێوشوێنە پێویستەکان بگرێتەبەر بۆ بەرپەرچدانەوەى هەر دەستدرێژییەکى تورکیا بۆ سەر خاکى عێراق و هێزە چەکدارەکانى عێراق و حەشدى شەعبى و دەزگا ئەمنییەکان بە پشتیوانى خودا ئامادەن بەرگرى لە خاکى پیرۆزى نیشتمان بکەن.   

 


ئەوەش لەکاتێکدایە، لە رۆژی ١٠ی ئەم مانگە، وەزارەتی بەرگری تورکیا، یەکەم رۆژی ‏دەستپێکردنی ئۆپراسیۆنی چنگی هەڵۆی ٢ی لە چیای گارە لە هەرێمی کوردستان راگەیاند، ‏کە تیایدا فڕۆکەی جەنگی و هەلیکۆپتەر و هێزێکی سەربازی، کە پێکهاتووە لە دوو ‏هەزار و ٢٠٠ سەرباز بەشداری تێدادەکەن.

پێشتریش، رەجەب تەیب ئەردۆغان سەرۆککۆماری تورکیا رایگەیاندبوو، "شەوێک بە بێدەنگی دێینە شنگال."