سەردێڕ:

وتەبێژێک بەناوی سەرۆکایەتی هەرێم: پێشمەرگەی رۆژ لە سەنگەری پێشەوەی پاراستنی کوردستانن

فۆتۆ: 
2021-01-13

5791 جار خوێندراوەتەوە

وتەبێژێک بەناوی سەرۆکایەتیی هەرێمی کوردستان رایگەیاند، پێشمەرگەی رۆژ دەیان شەهید و برینداریان داوە و تا ئەمڕۆ لە سەنگەری پێشەوەی پاراستنی خاکی کوردستاندان. ئەوەش لە وەڵامی ئەوەدایە، کە گوایە ئاڵدار خەلیل ئەندامی کۆنسەی هاوسەرۆکایەتی پارتی یەکێتی دیموکرات (پەیەدە) رایگەیاندووە، پێشمەرگەی رۆژ بەکرێگیراوی دەوڵەتی تورکیایە.

وتەبێژەکەی سەرۆکایەتی هەرێم باسی لەوەشکردووە، رۆژی سێشەممە ١٢ی کانوونی دووەمی ٢٠٢٠ ئاڵدار خەلیل، ئەندامی کۆنسەی هاوسەرۆکایەتيی پەیەدە لە چاوپێکەوتنێکى رۆژنامه‌وانيدا باسی لە دانوستاننی نێوان ئەنەکەسە و پەیەدە کردووه‌ و هێزی پێشمەرگەی رۆژى بە "بەکرێگیراوی دەوڵەتی تورکی لەقەڵەم دابوو".

ئاماژەی بەوەشکردووە، "ئاڵدار خەلیل باش دەزانێت و ئاگادارە کە قارەمانانی پێشمەرگەی رۆژ لە سەرەتای دروستبوونیانەوە تاوەکو ئەمڕۆ لە سەنگەری پێشەوەی پاراستنی خاکی کوردستاندا بوون، هیچ نیشتمانپەروەرێکی خاوەن ویژدان لەبیریان ناکات".

وتەبێژەکەی سەرۆکایەتی هەرێم ئاماژەی بەوەشکردووە، ئەو جۆرە لێدوانانە، "زیانگەیاندنە بە یەکڕیزی و مەرامی سەرەکی لێی تێکدانی گفتوگۆى نێوان لایەنە کوردییەکانە". دەشڵێت، "ئاشکرایە هەرکات باس لە بەکرێگیراوی دەکرێت، خەڵک يه‌كسه‌ر کێی بەبیردێتەوە".