سەردێڕ:

لێدوانی خەزعەلى لەبارەی بۆردومانەکانی سەر باڵیۆزخانەی ئەمریکا لە بەغدا

فۆتۆ: 
2020-12-31

4029 جار خوێندراوەتەوە

​ئەمیندارى گشتیى عەسائیبى ئەهلى حەق پێی وایە بۆردومانکردنى باڵیۆزخانەى ئەمریکا زیانى لە قازانجى زیاترە، دەشڵێت، "دەنگۆى بڵاوەپێکردنى هێزەکانمان لەناوچەى رەسافە دوورە لە راستییەوە."


 ئەمیندارى گشتیى عەسائیبى ئەهلى حەق پێی وایە بۆردومانکردنى باڵیۆزخانەى ئەمریکا زیانى لە قازانجى زیاترە، دەشڵێت، "دەنگۆى بڵاوەپێکردنى هێزەکانمان لەناوچەى رەسافە دوورە لە راستییەوە."

قەیس خەزعەلى ئەمیندارى گشتیى عەسائیب رایگەیاندووە، "بە بۆچوونى ئێمە بابەتى بۆردومانکردنى باڵیۆزخانەى ئەمریکا لە ناوچەى سەوز زیانى لە قازانجى زیاترە."

باسی لەوەشکردووە، "دەنگۆى بڵاوەپێکردنى هێزەکانمان لەناوچەى رەسافە دوورە لە راستییەوە، هەموو ئەوەى رووى دا لە ماوەى چەند رۆژى رابردوودا گەورەکردنى بابەتەکە بوو لەلایەن چەند دەزگایەکى راگەیاندنەوە."

قەیس خەزعەلى دەشڵێت، کارمانکرد بۆ هێورکرنەوەى بارودۆخەکە و بڵاونەبوونەوەى هیچ هێزێکى چەکدارى، هاوکات، ئەو ئۆتۆمبێلانەشى لە شەقامى فەلەستیندا بینران سەر بە حەشدى شەعبی بوون نەک عەسائیب.  

ئاماژەی بەوەشکردووە، تێوەگلانى گروپە بەرگرییەکان لەو بۆردومانانە زیانیان پێدەگەیەنێت لە رووى ناوبانگ و جەماوەریشەوە، چەند لایەنێک هەن دەیانەوێت لە رێگەى بابەتى دەستگیرکردنى ئەندامێکى حەشد و پاڵنان بەرەو روبەڕوبوونەوەى هێزە ئەمنییەکان بارودۆخەکە ئاڵۆزتر بکەن.

لە ماوەی رابردوودا، چەند موشەکێک ئاڕاستەی باڵیۆزخانەی ئەمریکا لە بەغدا کرا، لەکاردانەوەی هێرشەکەشدا، دۆناڵد ترەمپ رایگەیاند، "هەر ئەمریکییەک بکوژرێت ئێران بەرپرسیار دەبێت."

رۆژی هەینی رابردووش، فەرماندەیەکی عەسائیبی ئەھلی حەق لەگەڵ ژمارەیەک لە یاریدەدەرانی لە شاری بەغدا لەلایەن ھێزە ئەمنییەکانەوە بە تۆمەتی تێوەگلان لە ئاڕاستەکردنی موشەکی کاتیۆشا بۆ سەر ناوچەی سەوز دەستگیرکران، بەوهۆیەوە رەوشی شاری بەغدا ئاڵۆزبوو و ژمارەیەک چەکداری عەسائیبی ئەهلی حەق بڵاوەیانپێکرا، لە بەرامبەریشدا هێزەکانی دژەتیرۆری عێراق خرانەحاڵەتی ئامادەباشییەوە و مستەفا کازمی سەرۆکوەزیرانی عێراق رایگەیاندبوو، "بۆ روبەڕوبوونەوەی یەکلاکەرەوە ئامادەن ئەگەر پێویست بێت."