سەردێڕ:

نێچیرڤان بارزانی: عێراق بەناوی یاساوە فەرمانبەرانی هەرێمی کوردستانی لە موچە بێبەشکرد

فۆتۆ: 
2020-12-31

11992 جار خوێندراوەتەوە

لە پەیامی پیرۆزباییدا بەبۆنەی ساڵی نوێی زاینییەوە، نێچیرڤان بارزانی سەرۆکی هەرێمی کوردستان رایگەیاند، لە پەرلەمانی عێراق هەڵسوكەوتی هێزە سیاسییە سه‌ره‌كييه‌كان لەگەڵ هەرێمی كوردستان "زۆر سته‌مكارانه‌ بوو". دەشڵێت، عێراق بەناوی ياساوه‌ فەرمانبەران و موچەخۆرانی هەرێمی كوردستانی لە موچه‌ و شايسته‌ داراييه‌كانیان بێبەشكردووە.

سەرۆکی هەرێمی کوردستان راشیگەیاندووە، ئەو رەفتارەی عێراق "دژى گیانی هاوچارەنووسی و پێكەوەژیانه‌ و هەستنەكردنە بە هیچ بەرپرسیاريه‌تییەك بەرامبەر به‌ بەشێكی فەرمانبەرانی دەوڵەتی عێراق".

ئاماژەی بەوەشکردووە، " نەدەبووایە سه‌رۆكوه‌زيرانى عێراق و حكومەتى فیدراڵ و هەموو دەزگا فەرمییەكانی دەوڵەت، ئەو نادادپەروەرییە بەرامبەر به‌ فەرمانبەران و موچەخۆران و خەڵكی هەرێمی كوردستان قبوڵ بكەن".

باسی لەوەشکردووە، "حكومه‌تى عێراق ده‌بێ شايسته‌ دارايييه‌كانى ساڵى ٢٠٢٠ی هه‌رێمى كوردستان به‌پێى رێككه‌وتنه‌كانى پێشوو قه‌ره‌بوو بكاته‌وه‌، هەروەها چاوه‌ڕێين نه‌ته‌وه‌يه‌كگرتووه‌كان، كۆمه‌ڵگه‌ى نێوده‌وڵه‌تى و هاوبه‌شانمان رۆڵى خۆيان له‌ چاره‌سه‌ركردنى كێشه‌كاندا بگێڕن".

نێچیرڤان بارزانی زیاتر دەڵێت، پشوودرێژيی شاندی حكومەتی هەرێمی كوردستان و مانەوە بۆ زياتر له‌ دوو هه‌فته‌ لە بەغدا و نه‌هێشتنى هيچ به‌هانه‌يه‌ك بۆ رێكنه‌كه‌وتن، ئەوپەڕی نیازپاكی و ئامادەیيی هەرێمی كوردستانه‌ بۆ چارەسەركردنی كێشەكان، "بەڵام بەداخەوە تا ئێستا وەڵامێكی باش و كرده‌يى لەلایەن حكومەتی فیدراڵى عێراقه‌وه‌ بۆ كەمترین مافە داراییيەكانی هەرێمی كوردستان نييه‌".

نێچیرڤان بارزانی ئەو رەفتارانەی بەغدا بە سزادانی خەڵکی کوردستان دادەنێت و دەشڵێت، "ئەوە بە هیچ شێوەیەك ئامادەیی نییە بۆ چارەسەركردنی كێشەكان لەگەڵ هەرێمی كوردستان، بەڵكو سزادانی خەڵكی كوردستانە كه‌ به‌ هيچ شێوه‌يه‌ك ياسايى و ده‌ستوورى نييه و ته‌نيا بە مەبەست و بڕیاری سیاسی ده‌كرێت".

 

دەقی راگەیەنراوەکەی نێچیرڤان بارزانی، سەرۆکی هەرێمی کوردستان بەبۆنەی ساڵی نوێی زاینییەوە:

به‌رله‌ كۆتايي ساڵى 2020، لە پەرلەمانی عێراق هەڵسوكەوتی هێزە سیاسییە سه‌ره‌كييه‌كانى عێراق لەگەڵ هەرێمی كوردستان زۆر سته‌مكارانه‌ بوو. سیاسەتێكی پڕ لە دژایەتیكردنی هەرێمی كوردستان بوو به‌ ئامانجى پەكخستنی خزمەتگوزارییەكان و برسیكردنی خەڵكی هەرێمی كوردستان. له‌ یاسای پڕكردنەوەی كورتهێنانی دارایيدا، هه‌موو هه‌وڵێكيان دا و به‌ ناوى ياساوه‌ فەرمانبەران و مووچەخۆرانی هەرێمی كوردستانیان بە هەموو شێوەیەك لە مووچه‌ و شايسته‌ دارايييه‌كان بێبەش كرد.

ئەمە دژى گیانی هاوچارەنووسی و پێكەوەژیانه‌ و هەستنەكردنە بە هیچ بەرپرسیاريه‌تییەك بەرامبەر به‌ بەشێكی فەرمانبەرانی دەوڵەتی عێراق. به‌ڕێز سه‌رۆك وه‌زيرانى عێراق و حكوومەتى فیدراڵ و هەموو دەزگا فەرمییەكانی دەوڵەتی عێراق، نەدەبووایە ئەو نادادپەروەرییە بەرامبەر به‌ فەرمانبەران و مووچەخۆران و خەڵكی هەرێمی كوردستان قبووڵ بكەن. حكوومه‌تى عێراق ده‌بێ شايسته‌ دارايييه‌كانى ساڵى 2020ى هه‌رێمى كوردستان به‌پێى ڕێككه‌وتنه‌كانى پێشوو قه‌ره‌بوو بكاته‌وه‌، هه‌وره‌ها چاوه‌ڕێين نه‌ته‌وه‌ يه‌كگرتووه‌كان، كۆمه‌ڵگه‌ى نێوده‌وڵه‌تى و هاوبه‌شانمان ڕۆڵى خۆيان له‌ چاره‌سه‌ركردنى كێشه‌كاندا بگێڕن.

پشوودرێژيی شاندی حكومەتی هەرێمی كوردستان و مانەوە بۆ زياتر له‌ دوو هه‌فته‌ لە بەغدا و نه‌هێشتنى هيچ به‌هانه‌يه‌ك بۆ ڕێكنه‌كه‌وتن، ئەوپەڕی نیازپاكی و ئامادەیيی هەرێمی كوردستانه‌ بۆ چارەسەركردنی كێشەكان، بەڵام بەداخەوە تا ئێستا وەڵامێكی باش و كرده‌يى لەلایەن حكوومەتی فیدراڵى عێراقه‌وه‌ بۆ كەمترین مافە داراییيەكانی هەرێمی كوردستان نييه‌!

ئەوە بە هیچ شێوەیەك ئامادەیی نییە بۆ چارەسەركردنی كێشەكان لەگەڵ هەرێمی كوردستان، بەڵكو سزادانی خەڵكی كوردستانە كه‌ به‌ هيچ شێوه‌يه‌ك ياسايى و ده‌ستوورى نييه و ته‌نيا بە مەبەست و بڕیاری سیاسی ده‌كرێت. ئاماده‌يى و خواست و ويستمان بۆ گه‌يشتن به‌ چاره‌سه‌ر و ڕێككه‌وتنێكى يه‌كجاره‌كى له‌سه‌ر بنه‌ماى ده‌ستوورى عێراق دووپات ده‌كه‌ينه‌وه‌ كه‌ ماف و شايسته‌كانى گه‌لى كوردستان و سه‌قامگيرى بۆ ته‌واوى عێراق مسۆگه‌ر بكات.

لەسەر ئاستی سیاسيی هەرێمی كوردستانيش، بەداخەوە ناكۆكيی سیاسيی نێوان لایەنە سياسييه‌كان بەردەوامە، باری ژیان و دەروونیی خەڵكی كوردستان بە شەڕێكی ئاستنزمى سۆشیاڵمیدیا خراپتر كراوە! زۆركردنی ئەو جیاوازییە سیاسیيانە، هێزی سیاسيی هەرێمی كوردستان زۆر لاواز ده‌كات و دەبێتە هۆی پەرتكردنێكی گه‌وره‌ى كۆمەڵگە، ئەوەش سەقامگیريی كۆمەڵایەتی و ئاسایش لە هەرێمی كوردستان تێك دەدات و پێویستە بە زووترین كات ڕابگیرێت.

ئه‌ركى هەموو هێزە سیاسییەكانی كوردستانه‌ بیر لە پاراستنی مافەكان و قەوارەی ده‌ستوورى و سیاسيی هەرێمی كوردستان و سيستمى فيدراڵى بكەنەوە و پێكه‌وه‌ كارى بۆ بكه‌ن، لەبەرئەوەش دەبێ دەستبەجێ كۆتایی بەو ناكۆكییە سیاسیيانە بهێنرێت و لەسەر چارەسەركردنی كێشەكانمان ڕێكبكەوین، سه‌رۆكايه‌تيى هه‌رێمى كوردستانيش وه‌ك هه‌ميشه‌ به‌ هه‌موو شێوه‌يه‌ك هاوكار و پشتيوان ده‌بێت.

وێڕاى ده‌ربڕينى ئه‌وپه‌ڕى سوپاس و ڕێز و پێزانينمان بۆ تێگه‌يشتن و به‌رگه‌گرتن و خۆڕاگريى هاووڵاتييانى كوردستان، سوپاسى پێشمه‌رگه‌ قاره‌مانه‌كان و ته‌واوى هێزه‌ ئه‌منييه‌كان ده‌كه‌م كه‌ پارێزه‌رى كوردستانن، هه‌روه‌ها سوپاسى پزيشكان و په‌رستاران و ته‌واوى كارمه‌ندانى كه‌رتى ته‌ندروستى ده‌كه‌م كه‌ له‌ ڕيزى پێشه‌وه‌ى به‌ره‌نگاربوونه‌وه‌ى ڤايرۆسى كۆرۆنادا بوون.

هه‌رێمى كوردستان وه‌ك هه‌ميشه‌ به‌ فاكته‌رێكى ئارامى و سه‌قامگيرى له‌ عێراق و ناوچه‌كه‌ ده‌مێنێته‌وه‌. له‌سه‌ر بنه‌ماى به‌رژه‌وه‌نديى هاوبه‌ش، په‌ره‌ به‌ په‌يوه‌ندييه‌كانى له‌گه‌ڵ وڵاتانى دراوسێ و جيهان ده‌دات. له‌ هاوكارى و هه‌ماهه‌نگى له‌گه‌ڵ هاوپه‌يمانان و هاوبه‌شانمان به‌رده‌وام ده‌بێت كه‌ هێشتا له‌ عێراق و هه‌رێمى كوردستان پێويستيمان به‌ به‌رده‌واميى ئه‌رك و پشتيوانييانه.

پێكه‌وه به‌ يه‌كڕيزى و يه‌كهه‌ڵوێستى ده‌توانين به‌سه‌ر هه‌موو سه‌ختى و قه‌يرانه‌كاندا سه‌ر بكه‌وين، شوێن و پێگه‌يه‌كى باشتر له‌ عێراق، ناوچه‌كه‌ و جيهان بگرين و ڕه‌وڕه‌وه‌ى په‌ره‌پێدان و پێشكه‌وتن له‌ وڵاته‌كه‌مان بخه‌ينه‌وه‌ گه‌ڕ. هه‌موومان له‌ كوردستان به‌ ته‌بايى، لێبورده‌يى و يه‌كترقبووڵكردن، به‌ ئومێده‌وه‌ به‌ره‌و ئاينده‌يه‌كى ڕووناك هه‌نگاو ده‌نێين.

ساڵى تازه‌ له‌ هه‌مووان پيرۆز بێت، هيواى ساڵێكى پڕ له‌ خۆشى و سه‌ركه‌وتن بۆ هه‌مووان ده‌خوازم.

نێچيرڤان بارزانى