سەردێڕ:

سبەینێ قوباد تاڵەبانی دەچێتە پەرلەمانی کوردستان

فۆتۆ: 
2020-12-27

2261 جار خوێندراوەتەوە

سبەینێ پەرلەمانی کوردستان بە ئامادەبوونی قوباد تاڵەبانی سەرۆکی شاندی دانوستانکاری هەرێم بۆ بەغدا و ئەندامانی دیکەی شاندەکە کۆدەبێتەوە و دوایین ئەنجامی دانوستانەکانی نێوان هەولێر و بەغدا تاوتوێدەکەن.


سبەینێ پەرلەمانی کوردستان بە ئامادەبوونی قوباد تاڵەبانی سەرۆکی شاندی دانوستانکاری هەرێم بۆ بەغدا و ئەندامانی دیکەی شاندەکە کۆدەبێتەوە و دوایین ئەنجامی دانوستانەکانی نێوان هەولێر و بەغدا تاوتوێدەکەن.

سامان ئەحمەد بەڕ‌ێوەبەری راگەیاندنی پەرلەمانی کوردستان رایگەیاندووە، جگە لە جێگری سەرۆکی حکومەتی هەرێم، هەریەکە لە وەزیرەکانی دارایی، پلاندانان، وەزیری هەرێم بۆ کاروباری دانوستان لەگەڵ حکومەتی عێراق و سەرۆکی فەرمانگەی هەماهەنگی و بەدواداچوون بەشداری کۆبوونەوەکەی پەرلەمان دەکەن.

بڕیاریشە کۆبوونەوەکە، سبەینی کاتژمێر ١١ی پێشنیوەڕۆ ئەنجامبدرێت و تێیدا سەرۆکی فراکسیۆنەکان و لیژنەکانی دارایی و یاسایی و سامانە سروشتییەکان ئامادەبن و لە کۆبوونەوەکەشدا وردەکاری دانوستانەکانی شاندی هەرێم لەگەڵ عێراق تاوتوێ بکرێت.

رۆژی ١٦ی ئەم مانگە، پەرلەمانی کوردستان داوای لە حکومەت کرد، شاندی دانوستانکاری هەرێم بۆ بەغدا بەشداری کۆبوونەوەی پەرلەمان بکات بۆ وەڵامدانەوەی پرسیاری فراکسیۆنەکان لەبارەی وردەکاریی گفتوگۆکان، رۆژی ٢٣ی ئەم مانگەش حکومەت وەڵامی پەرلەمانی داوەتەوە و رایگەیاندووە رۆژی ٢٨ی ئەم مانگە شاندەکەیان دەنێرنە پەرلەمان.