سەردێڕ:

ئاژانسی سانا: بەرگری موشەكی سوریا چەند موشەكێكی ئیسرائیلی تێكشكاندووە

فۆتۆ: 
2020-12-25

945 جار خوێندراوەتەوە

بەپێی هەواڵێكی ئاژانسی سانای سوری، سیستەمی بەرگری ئاسمانی سوپای سوریا چەند موشەكێكی سوپای ئیسرائیلیان لە ئاسمانی پارێزگای حەما تێكشكاندووە، روانگەی سوریاش ئاماژەی بە كوژرانی نۆ چەكداری میلیشیا شیعەكان کردووە.

وەک ئەو ئاژانسەی سوریا باسیكردووە، درەنگانێكی شەوی پێنجشەممە سوپای ئیسرائیل چەند موشەكێكی ئاڕاستەی ناوچەی مەسیافی ریفی حەما كردووە، بەڵام زۆربەی موشەكەكان لەلایەن سیستەمی بەرگری موشەكی سوپای سوریاوە تێكشكێندراون.

ئەوەش لەكاتێكدایە، پێش بڵاوكردنەوەی هەواڵی موشەكەكان لەلایەن ئەو ئاژانسەوە، تەلەفزیۆنی فەرمی سوریا هەواڵی روودانی چەند تەقینەوەیەكی لە ناوەڕاستی سوریا بڵاوكردەوە.

لەلایەكی دیكەوە، روانگەی سوریا بۆ مافەكانی مرۆڤ ئاشكرایكردووە، ئامانج لەو هێرشەی ئیسرائیل میلیشیا ئێرانیەكان بووە و بەو هۆیەوە نۆ چەكداریان لێ كوژراوە.