سەردێڕ:

وێنە.. لە رووداوێکی تەقەکردندا ​لە ​هەولێر ​دوو ​کەس ​کوژران

فۆتۆ: 
2020-12-01

45053 جار خوێندراوەتەوە

پەیامنێری ئێن ئاڕ تی رایگەیاند، لە رووداوێکی تەقەکردندا لە گەڕەکی موفتی شاری هەولێر، بەپێی زانیارییە سەرەتاییەکان دوو کەس کوژراون و دوو کەسی دیکەش بریندار بوون.

ئەحمەد مستەفا پەیامنێری ئێن ئاڕ تی لە هەولێر رایگەیاند، لە رووداوێکی تەقەکردندا لە گەڕەکی مەفتی شاری هەولێر، بەپێی زانیارییە سەرەتاییەکان دوو کەس کوژران و دوو کەسی دیکەش بریندار بوون، ئاماژەی بەوەشکرد، ئەو کەسانەی تەقەکانیان کردووە ماوەیەک دوای ئۆتۆمبێلەکە کەوتوون و تاوەکو لەو جێگەیەدا پێیان گەیشتوون و تەقەیان لێکردوون.

ئەوەشی خستەڕوو، رووداوەکە لە دوای کاتژمێر ٩:٣٠ خولەکەوە بووە و تەقەیەکی زۆر کراوە، کە ئۆتۆمبێلەکەش زیاتر لە ١٠ گولـلەی پێوەیە.

ئاماژەی بەوەشكرد، چوار کەس لەناو ئۆتۆمبێلەکەدا بوون و ئەو کەسەی تەقەکەی کردووە رایکردووە، هاوکات، ئۆتۆمبێلەکە ژمارەی دهۆکی لەسەرە.

راشیگەیاند، تاوەکو ئێستا لایەنە ئەمنییەکان بە فەرمی هیچ لێدوانێکیان لەبارەی رووداوەکەوە نەداوە و هیچ کەسێکیش بە ناوی کەسوکاری کوژراو و بریندارەکانەوە ناهاتوونەتە شوێنی رووداوەکە.

ئەوەش لە کاتێکدایە، لەماوەی کەمتر لە ٢٤ کاتژمێردا ئەوە دووەم رووداوی کوشتنە لە شاری هەولێر روویدابێت و تیایدا سێ کەس کوژراون و سێ کەسی دیکەش برینداربوون.