سەردێڕ:

تەندروستی جیهانی لەبارەی دۆزینەوەی سەرچاوەی ڤایرۆسی کۆرۆنای نوێوە بەڵێنێک دەدات

فۆتۆ: 
2020-12-01

9188 جار خوێندراوەتەوە

بەڕێوەبەری رێکخراوی تەندروستی جیهانی بەڵێنیدا هەموو رێوشوێنێک بگرێتەبەر لە پێناو دۆزینەوەی سەرچاوەی یەکەمی سەرهەڵدان و بڵاوبوونەوەی ڤایرۆسی کۆرۆنای نوێ.

تێدرۆس ئەدهانۆم گابریسوس بەڕێوەبەری رێکخراوی تەندروستی جیهانی رایگەیاند، "دەمانەوێت سەرچاوەی کۆرۆنای نوێ بزانین، هەرچی لەتواناماندا هەبێت دەیکەین."

راشیگەیاند، رێکخراوەکە بەپەلە تیمێک رەوانەی چین دەکات و هەموو ئەو رەخنە و تۆمەتانەش رەتدەکاتەوە ئاراستەی رێکخراوەکە دەکرێت لەبارەی ئاسانکاری کردن بۆ چین.

هاوکات، دۆناڵد ترەمپ سەرۆکی ئێستای ئەمریکا چەندین رەخنەی ئاراستەی رێکخراوی تەندروستی جیهانی کرد، بەهۆی شێوازی مامەڵەکردنیەوە لە سەرەتای دەرکەوتن و بڵاوبوونەوەی ڤایرۆسەکەوە لە چین کە بە "ڤایرۆسی چینی" وەسفی دەکرد.

دوابەدوای سەرهەڵدان و بڵاوبوونەوەی کۆرۆنای نوێ بۆ یەکەمجار لە شاری وهانی سەربە هەرێمی هوبی، چین لەلایەن وڵاتانی دەرەوە روبەڕوی چەندین رەخنەبووەوە.

ڤایرۆسی کۆرۆنای نوێ، تاوەکو ئێستا بووەتە هۆی توشبوونی زیاتر لە ٦٢ ملیۆن کەس لە جیهاندا و لەو ژمارەیەش زیاتر لە یەک ملیۆن و ٥٠٠ هەزار کەس گیانیان لەدەستداوە.