سەردێڕ:

ویلایەتێکی ئوستڕاڵیا سەرکەوتنی بەسەر کۆرۆنادا راگەیاند

فۆتۆ: 
2020-11-27

99033 جار خوێندراوەتەوە

ویلایەتی ڤیکتۆریا لە ئوستڕاڵیا پاش تێپەڕینی ٢٨ رۆژ بەسەر تۆمارنەکردنی هیچ حاڵەتێکی توشبوون بە ڤایرۆسی کۆرۆنادا سەرکەوتنی ویلایەتەکەی بەسەر ڤایرۆسەکەدا راگەیاند.

ئەمڕۆ هەینی، وەزیری تەندروستی ئوستڕاڵیا هەواڵی سەرکەوتنی بەسەر ڤایرۆسی کۆرۆنادا لە ویلایەتی ڤیکتۆریا راگەیاند و باسی لەوەکرد، بۆ ماوەی ٢٨ رپژەهیچ کەسێکی کۆرۆنا لە وڵاتەکەدا تۆمارنەکراوە، ئەوەشی خستوەتەڕوو، دوای ١١ مانگ لە هەوڵدان بۆ کۆنتڕۆڵکردنی ڤایرۆسەکە لە ئوستراڵیا، دواجار و بۆ ماوەی چوار هەفتە هیچ کەسێک نوێ تۆمارنەکراوە لەو ویلایەتەدا.

راشیگەیاند، لایەنە تەندروستییەکانی ئەو وڵاتە لە هەوڵی بەردەوامدان بۆ پشکنینی زیاتر و هۆشیارییان داوەتە هاوڵاتیانیان بەمەستی رەچاوکردنی رێکارە تەندروستییەکان.

لە سەرەتای بڵاوبوونەوەی ڤایرۆسی کۆرۆناوە تاوەکو ئێستا هەشت هەزار کەس لە ویلایەتی ڤیکتۆریا توشی ڤایرۆسی کۆرۆنابوون، کە ناوەندەکەی مێلبۆرنە و لە ئێستاشدا ماوەی ٢٨ رۆژە هیچ حاڵەتێکی نوێی توشبوون بە ڤایرۆسەکە تۆمارنەکراوە، بەوەش دەسەڵاتدارانی ئەو ناوچەیە سەرکەوتنیان بەسەر کۆرۆنا و کۆتایی هاتنی کۆرۆنا لە ویلایەتەکەیان راگەیاند.

ئەمە لە کاتێکدایە، لەسەرەتای ئەم مانگەوە هەریەك لە کۆمپانیای فایزەر - بایۆنیك و مۆدێرنا و ڤاکسینەکەی ئۆکسفۆرد و ڤاکسینە روسیەکە، کاریگەریی ڤاکسینەکەیانیان راگەیاند و بڕیاریشە لە ناوەڕاستی مانگی داهاتووەوە (کانونی یەکەم) دەست بە دابەشکردنی بکرێت.