سەردێڕ:

لەبارەى کەمکردنەوەى کرێى خوێندن لە زانکۆ و پەیمانگا تایبەتەکان روونکردنەوە دەدرێت

فۆتۆ: 
2020-11-21

6451 جار خوێندراوەتەوە

موسلیم عەبدوڵا قەسرێ رایگەیاند، پێشنیارمان کردووە کە کرێى خوێندن لە زانکۆ و پەیمانگا تایبەتەکانى هەرێمى کوردستان بە رێژەى ٢٥% کەمبکرێتەوە.

موسلیم عەبدوڵا قەسرێ، جێگری سەرۆکی لیژنەی پەروەردە و خوێندنی باڵا لە پەرلەمانى کوردستان بە ئێن ئاڕ تى راگەیاند، "پێشتر داوامان کردبوو کە کرێى خوێندن لە زانکۆ و پەیمانگا حکومى و تایبەتەکان کەمبکرێتەوە و خۆشبەختانە کرێى زانکۆ و پەیمانگا حکومیەکان بە رێژەى لە ٤٥% کەمکرایەوە،" دەشڵێت، "بەهەمانشێوە داواى کەمکردنەوى کرێی خوێندنی زانکۆ و پەیمانگا تایبەتەکانمان کردووە و بڕیارە لە چەند رۆژی داهاتوودا وەزارەتی خوێندنی باڵا لەوبارەیەوە بڕیاربدات." 

لەبارەى کردنەوەى بەشە ناوخۆییەکان، جێگری سەرۆکی لیژنەی پەروەردە و خوێندنی باڵا لە پەرلەمانى کوردستان رایگەیاند، "چوار زانکۆى هەرێمى کوردستان بەهۆى هەبوونى چەند بیانویەک ئامادەنەبوون بەشە ناوخۆییەکان بکەنەوە، بەڵام جەختمانکردەوە کە پێویستە بکرێنەوە و پیدەچیت پێش ١ى مانگى داهاتوو بەشە ناوخۆییەکان بکرێنەوە."

ئەوەش دوایی ئەوەدێت، پێشتر وەزارەتی خوێندنی باڵا و توێژینەوەى زانستى حکومەتى هەرێمى کوردستان بڕیاریدا کە کرێی خوێندنی پارالێل و ئێواران لە زانکۆ حکومییەکان بەڕێژەی ٤٥% کەمبکاتەوە.