سەردێڕ:

بارەگای بارزانی: ١٦ی ئۆکتۆبەر خیانەتێکی لەبیرنەکراوە

فۆتۆ: 
2020-10-16

5916 جار خوێندراوەتەوە

بارەگای مەسعود بارزانی، سەرۆکی پارتی دیموکراتی کوردستان رایگەیاند، ١٦ی ئۆکتۆبەر "خیانەتێکی لەبیرنەکراو و زامێکی قوڵە لە جەستەی نیشتیماندا".


بارەگای مەسعود بارزانی، سەرۆکی پارتی دیموکراتی کوردستان رایگەیاند، ١٦ی ئۆکتۆبەر "خیانەتێکی لەبیرنەکراو و زامێکی قوڵە لە جەستەی نیشتیماندا".

ئەمڕۆ کە یادی رووداوەکانی ١٦ی ئۆکتۆبەری ٢٠١٧یە، لاپەڕەی فەڕمی بارەگای بارزانی لە فەیسبووک وێنەیەکی بڵاوکردووەتەوە تیایدا ھاتووە، "١٦ی ئۆکتۆبەر خیانەتێکی لەبیرنەکراو و زامێکی قوڵە لە جەستەی نیشتیماندا".

ھەر ئەمڕۆ مەسرور بارزانی، سەرۆکی حکومەتی ھەرێم بە بۆنەی یادی ١٦ی ئۆکتۆبەری ٢٠١٧وە رایگەیاند، "ئەو دۆخە نائاساییەی کە لە ئەنجامی خیانەتی خاکفرۆشانەوە لە کەرکوک و ناوچە کوردستانییەکانی تر ھاتەئاراوە، جێگەی قبوڵکردن نییە".

وتیشی، "ھەرگیز زامی خیانەتی خاکفرۆشانمان بیرناچێتەوە، بەڵام لە خیانەت بە زامتر ئەوەیە، کە گەل خیانەتکار سزانەدات".

دوای ئەوەی بەشێکی بەرچاوی سەرکردایەتی سیاسی هەرێمی کوردستان لە ناوەڕاستی ساڵی ٢٠١٧دا بڕیاری ریفراندۆمی سەربەخۆییان دەرکرد، لە دوای ئەنجامدانی پرۆسەکە و سێ ساڵ لەمەوبەر لە رۆژێکی وەکو ئەمڕۆدا، هێزە عێراقییەکان هاتنە ناو شاری کەرکوک و دوای زنجیرەیەک ئۆپراسیۆن لە ٥١%ی خاکی کوردستان لەدەستدرا.

لای خۆیانەوە، سەرکردایەتی پارتی دیموکراتی کوردستان هەمیشە وەکو "خیانەت" تەماشای رووداوەکانی ١٦ی ئۆکتۆبەر دەکەن و پێیانوایە "بەشێک لە سەرکردایەتی یەکێتی بە رێککەوتنی ژێربەژێر شاری کەرکوکیان فرۆشتووە"، لە بەرامبەردا، ئەو بەشە لە سەرکردایەتی یەکێتی دەڵێن، خودی پرۆسەی ریفراندۆم هەڵە بووە و ئەوان لەگەڵیدا نەبوون و کشانەوەیان لە کەرکوک "بۆ وێران نەبوونی شارەکە و ئاوارەنەبوونی خەڵکەکەی بووە" چونکە سوپای عێراق بڕیاری کۆنترۆڵکردنەوەی دابوو.