سەردێڕ:

باڵیۆزی ئەمریکا لە بارەی ئازادی رۆژنامەنوسییەوە چی بە بارزانی وت؟

فۆتۆ: 
2020-09-14

13155 جار خوێندراوەتەوە

باڵیۆزی ئەمریکا لە عێراق لەگەڵ مەسعود بارزانی کۆبووەوە و گفتوگۆیان لەسەر چەندین پرس کرد، لەنێویشیاندا دەستدرێژیکردنە سەر ئازادی رۆژنامەگەری لە هەرێمی کوردستاندا.

ئەمڕۆ دووشەممە، ماتیۆ تولەر باڵیۆزی ئەمریکا لە عێراق لە تویتێکدا رایگەیاند، لە کۆبوونەوەکەیاندا لەگەڵ مەسعود بارزانی سەرۆکی پارتی دیموکراتی کوردستان، جەختیان  لەسەر گفتوگۆی ستراتیجی نێوان ئەمریکا و عێراق و گفتوگۆکردن لەسەر بودجە لەگەڵ بەغدا و پەیوەندییەکانی یەکێتی و پارتی کردووەتەوە، هاوکات، باسیان لە گرنگی ئازادی رۆژنامەگەری و دۆخی ئەمنی لە هەرێم کردووە.

لە کۆبوونەوەکەی ئەمڕۆی مەسعود بارزانی و باڵیۆزی ئەمریکادا، باس لە ئازادی رۆژنامەگەری کراوە، لە کاتێکدا تەنها لە ماوەی مانگی رابردوودا چەندین پێشێلکاریی بەرامبەر کەناڵی ئێن ئاڕ تی و رۆژنامەوانەکانی کراوە.

هاوکات، ماوەی ٢٤ رۆژە نووسینگەکانی کەناڵی ئێن ئاڕ تی لە هەولێر و دهۆک داخراوە و بەپێی زانیارییەکانی ئێن ئاڕ تیش، تا ئێستا هیچ داوایەکی یاسایی لەسەر ئێن ئاڕ تی لە دادگاکانی هەولێر بوونی نییە، بەو پێیەش ئەو لێدوانانەی رێکخەری راسپاردە نێودەوڵەتییەکان لە هەرێم لەبارەی بوونی سکاڵا لەسەر کەناڵەکە داویەتی ناڕاست بوون و ئەو کەسە لەگەڵ رێکخراوە نێودەوڵەتییەکان راستگۆ نەبووە.

لە شەوی ١٩ لەسەر ٢٠ی ئابیشدا، ئەحمەد زاخۆیی پەیامنێری ئێن ئاڕ تی لە زاخۆ لە کاتی رووماڵی خۆپیشاندانەکەی بەشێک لە هاوڵاتیانی ئەو قەزایەدا، بەبێ بڕیاری دادگا دەستگیرکرا و پاش ١١ رۆژ لە مانەوەی لە زینداندا ئازادکرا، لەو بارەیەشەوە ئەیهان سەعید، نوێنەری سەنتەری میترۆ لە دهۆک بە ئێن ئاڕ تی راگەیاندبوو، لە ماوەی ئەو ١١ رۆژەی ئەحمەد زاخۆیی دەستگیرکراوە، دادگایینەکراوە و رێگە بە سەردانکردنی نەدراوە.

لەلایەکی دیکەوە، هەر لە ٢٠ی ئابدا، شکێران زێباری پەیامنێری قەزای ئاکرێی ئێن ئاڕ تی لە یەکێک لە بازگەکانی ئەو شارەدا و لەلایەن ئاسایشەوە دەستبەسەرکرا و رەوانەی بنکەی ئاسایش کرا.

هەر لە هەمان رۆژیشدا، ئاسایشی ناحیەی دێرەلوکی سەر بە قەزای ئامێدی، نیهاد ئۆرەماری پەیامنێری ئێن ئاڕ تی، لە کاتێکدا دەیویست راپۆرتێک لەسەر کەوتنە خوارەوەی فڕۆکەیەکی سیخوڕی تورکیا بکات، بە سەرجەم کەلوپەلە رۆژنامەوانییەکانییەوە لەلایەن ئاسایشەوە دەستگیرکرا.

هاوکات، لە ١٢ی ئابیشدا، کە خۆپیشاندانێکی فراوان لە چەندین ناوچەی هەرێم بەڕێوەچوو، سەرجەم ستافی ئێن ئاڕ تی لە دهۆک لە کاتی رووماڵی خۆپیشاندانەکاندا دەستبەسەرکران و وێنەگرێکی ئێن ئاڕ تیش لە هەولێر دەستگیرکرا.