سەردێڕ:

ئاسایشی راپەڕین: دوو تۆمەتبار دەستگیرکران کە بڕێکی زۆر پارەی ساختەیان پێبوو

فۆتۆ: 
2020-09-13

2597 جار خوێندراوەتەوە

ئاسایشی راپەڕێن رایگەیاند، دوو تۆمەتبار دەستگیرکراون کە بڕێکی زۆر پارەی ساختەیان پێبووە کە دیناری عێراقی و دۆلاری ئەمریکیشی تێدابووە.

بەڕێوەبەرایەتی ئاسایشی راپەڕین رایگەیاند، "لە درێژەی کار و چالاکییەکانی بەڕێوەبەرایەتی ئاسایشی راپەڕین، هێزەکانمان لە بنکەی ئاسایشی شکارتە، پاش وەرگرتنی رەزامەندی دادوەر بە وەرگرتنی زانیاری و بە دواداچوونی دروست، توانیان دوو تۆمەتبار بە ناوەکانی ( ش،ح،ع)، (ب،م،ف) دەستگیر بکەن."

ئاماژەی بەوەشكردووە، "دوو تۆمەتبارەکە لە رەگەزی نێر و دانیشتووی سلێمانین، کە بڕێکی زۆری پارەی ساختەیان لە جۆری ٢٥ هەزاری و ١٠ هەزاری پێبووە و بڕەکەی  شەش ملیۆن و ٣٨٠ هەزار بووە، هاوکات، هەزار و ٨٠٠ دۆلاری ئەمریکی سەختەشیان پێبووە."

ئەوەش هاتووە، "ئەم دوو تۆمەتبارە بڕێکی زۆر پارەی وڵاتانی بیانیشیان پێبووە، کە ساختە نەبوون لەوانە، ١٠٠ دۆلاری ئەمریکی، ٤٠ ڕۆبلی بیلا روسی،٥٠٠ درهەمی ئیماراتی، ١٠ ریاڵی سعودی، لەگەڵ  ١٣ کارتی مۆبایل و دوو مۆبایلی ئایفۆنی هەشت پڵەس و یەک مۆبایلی عادی (سادە) نۆکیا و چوار ئاڕمی ئۆتۆمبێلیان پێبووە."

ئەوەش خراوەتەڕوو، "بە بڕیاری دادوەر و بە پێی مادەی ٢٨١ پەڕاوی لێکۆڵینەوەیان بۆ کراوەتەوە و لێکۆڵینەوە لەگەڵیان بەردەوامە و بە وتەی خۆیان ئەو تۆمەتبارانە لە هەولێرەوە هاتوون."