سەردێڕ:

کازمی ناوەڕۆکی کۆبوونەوەکەی لەگەڵ نێچیرڤان بارزانی ئاشکراکرد

فۆتۆ: 
2020-09-11

20499 جار خوێندراوەتەوە

سەرلەبەیانی ئەمڕۆ سەرۆکوەزیرانی عێراق و سەرۆکی هەرێم کۆبوونەوە و گفتوگۆیان لەسەر کێشە هەڵواسراوەکان و دۆسییەی ئەمنی و روبەڕوبوونەوەی تیرۆر و ئاوارەکان و هەڵبژاردنە پێشوەختەکەی عێراق کردووە.

ئەمڕۆ هەینی، نوسینگەی راگەیاندنی مستەفا کازمی سەرۆکوەزیرانی عێراق لە راگەیاندراوێکیدا ناوەڕۆکی کۆبوونەوەکەی لەگەڵ نێچیرڤان بارزانی سەرۆکی هەرێمی کوردستان بڵاوکردەوە و تێیدا هاتووە، "لە کۆبوونەوەکەدا گفتوگۆیان لەسەر دۆسییە هاوبەشەکانی نێوان حکومەتی فیدڕاڵ و حکومەتی هەرێم کرد."

ئەوەش هاتووە، "لە کۆبوونەوەکەدا جەختیانکردەوە لەسەر گرنگی یەکخستنی ریزەکان و هەڵوێستەکان لە روبەڕوبوونەوەی ئاڵنگارییەکان."

باس لەوەشکراوە، "هەردوولا هاوڕابوون لەسەر گرنگی پشتبەستن بە گفتوگۆکان و پەنابردن بۆ چەتری دەستوور بۆ چارەسەرکردنی کۆی دۆسییەکان بە مەبەستی گەیشتن بە باشترین رێککەوتن کە خزمەتی گەلی عێراق و پێکهاتەکانی بکات."

ئەمڕۆ دوو رۆژە مستەفا کازمی لە هەرێمی کوردستانە و کەمێک لەمەوبەریش گەیشتە سلێمانی و لەگەڵ بەرپرسانی شارەکە کۆدەبێتەوە. چاوەڕوانیشدەکرێت، دوانیوەڕۆ سەردانی پارێزگای هەڵەبجە بکات.