سەردێڕ:

شارەوانی هەولێر: ٨٥ هەزار یەكەی نیشتەجێبوون تاپۆ دەكرێن

فۆتۆ: 
2020-09-10

2835 جار خوێندراوەتەوە

سەرۆكی شارەوانی هەولێر ڕایگەیاند، ٨٥ هەزار یەكەی نیشتەجێبوون لە پڕۆژە و كۆمەڵگەكان هەیە و بەم نزیكانە سەرجەمیان تاپۆ دەكرێن.

عەبدولواحید ئەحمەد، سەرۆكی شارەوانی هەولێر لە كۆنفرانسێكی هەواڵیدا ڕایگەیاند، "٨٥ هەزار یەكەی نیشتەجێبوون لە پڕۆژە و كۆمەڵگەكان هەیە و بەم نزیكانە سەرجەمیان تاپۆ دەكرێن و لە ئێستاشدا، پێنج هەزار یەكەی كۆمەڵگەكانی نیشتەجێبوون بۆ تاپۆكردن ئامادەن".

ئاماژەی بەوەشكرد، "ئەو كۆمەڵگە و یەكانەی نیشتەجێبوون خاوەندارییەتی بۆ كەسەكانیان دەكرێت ئەوەیش هەنگاوێكی گرنگە و بەم نزیكانە ئەوانەی تریش تەواو دەكرێت".

هەروەها، سامان عارەب سەرۆكی لقی هەولێری دەستەی وەبەرهێنان ڕایگەیاند، "لە ئێستادا پێنج هەزار یەكەی نیشتەجێبوون كاریان تەواو بووە، لە ئایندەیەكی نزیكدا سەرجەمیان تەواو دەبن".

ئاماژەی بەوەشكرد، "هەر شوێنێك و كۆمەڵگەیەك ئێمە دەستنیشانی دەكەین دەبێت لە ماوەی یەك مانگدا سەردانی تاپۆ بكەن بۆ تەواوكردنی مامەڵەكانیان، ئەگینا دواتر خۆیان بەرپرس دەبن".

بەگوێرەی پلانەکانی شارەوانی هەولێر، لە قۆناغی یەکەمدا شاری ئاشتی یەک، ئێمپايه‌ر وۆڵد، کۆمەڵگەی لاوان، کۆمەڵگەی دەروازەی هەولێر، شاری ئیتاڵی دوو و شاری باجگری نیشتەجێ بوون تاپۆ دەکرێن.