سەردێڕ:

پشکی هەرێم لە پرۆژەیاسای بودجەی فیدراڵی ٢٠٢٠دا ئاشکراکرا

فۆتۆ: 
2020-09-09

89225 جار خوێندراوەتەوە

بەگوێرەی پرۆژەیاسای بودجەی فیدراڵی ٢٠٢٠ی عێراق، پشکی هەرێم هەروەکو ساڵی ٢٠١٩ دیاریکراوە کە تێیدا، لە ئەگەری رادەستکردنی ٢٥٠ هەزار بەرمیل نەوتی رۆژانە بە بەغدا، ئەوا بە بڕی ١٢،٦٧ بودجە رەوانەی هەرێم دەکرێت.

بەگوێرەی رەشنوسی پرۆژەیاسای بودجەی فیدراڵی ٢٠٢٠ی حکومەتی ناوەندی عێراق کە کۆپییەکی دەست ئێن ئاڕ تی کەوتووە، تێیدا هاتووە، ئەگەر حکومەتی هەرێمی کوردستان رۆژانە بڕی ٢٥٠ هەزار بەرمیل رادەستی حکومەتی فیدراڵی بکات، لە بەرامبەردا، هەمان بڕی ئەو بەشەبودجەیەی ساڵی ٢٠١٩ بۆ هەرێم دیاریکرابوو دەنێردرێت، کە بریتی بوو لە ١٢،٦٧ی کۆی بودجەی عێراق.

دیاریکردنی ئەو بڕە لە بەشەبودجەی فیدراڵی بۆ هەرێم دەگەڕێتەوە بۆ سەردەمی حەیدەر عەبادی، سەرۆکوەزیرانی پێشووی عێراق، بەڵام بەهۆی رادەستنەکردنی ٢٥٠ هەزار بەرمیل نەوتی رۆژانەوە، هێشتا نەچووەتە بواری جێبەجێکردنەوە.

دواتر و لە سەردەمی عادل عەبدولمەهدی، سەرۆکوەزیرانی پێشووی عێراق کە بەهۆی فشاری خۆپیشاندەرانەوە کۆتایی ساڵی رابردوو دەستیلەکارکێشایەوە، رێککەوتنێکی سیاسی لەنێوان هەرێم و بەغدادا کرا بۆ ناردنی موچەی موچەخۆرانی هەرێم.

پاش ئەوەی مستەفا کازمیش بووە سەرۆکوەزیران، ئەو بڕەی کە بە رێککەوتنی هەرێم و بەغدا دیاریکرابوو وەستێنرا و لە مانگی رابردووشەوە و بۆ نیشاندانی نیازپاکی خۆی، مستەفا کازمی بڕیاریدا بە ناردنی مانگانەی ٣٢٠ ملیار دینار بۆ ماوەی سێ مانگ و تا ئەوکاتەی بە تەواوی لەسەر هەموو پرسە جیاوازەکان رێککەوتن دەکرێت.