سەردێڕ:

وێنە.. ٢٢ خێمەى ئاوارەکانى شنگال لە هەردوو کەمپى سنوری زاخۆ سوتان

فۆتۆ: 
2020-09-09

1421 جار خوێندراوەتەوە

بەرگرى شارستانى دهۆک ڕایگەیاند، بەهۆى شۆرتى کارەباوە ٢٢ خێمەى ئاوارەکانى شنگال لە هەردوو کەمپى قادیا و بێرسڤى لە سنورى قەزاى زاخۆ سوتان.

لەو بارەیەوە، کاروان زەکى بەرپرسى راگەیاندنى بەڕێوەبەرایەتى کۆچ و کۆچبەرانى دهۆک بە ئێن ئاڕ تى ڕاگەیاند، "لە کاتژمێر ٤ى بەرەبەیانى ئەمڕۆ چوارشەممە، بەهۆى شۆرتى کارەباوە ئاگر لە ١٢ خێمەى ئاوارەکانى شەنگال لە کەمپى قادیا کەوتەوە و لە کاتژمێر ٩ى بەیانى ئەمڕۆشدا ئاگر لە ١٠ خێمەى دیکەى ئاوارەکانى شەنگال لە کەمپى بێرسڤى سنورى زاخۆ کەوتەوە".

ئاماژەى بەوەشکرد، "هەردو ئاگرەکە بەهۆى شۆرتى کارەباوە کەتوونەتەوە و تیمەکانى ئاگرکوژێنەوە بەزوویی گەشتوونەتە شوێنى ڕووداوەکان و توانیان ئاگرەکان کۆنتڕۆڵ بکەن."

ئەوەشى خستەڕوو، "لە هەردوو رووداوەکەدا هیچ زیانێکى گیانى نەبووە و زیانەکان تەنها ماددى بوون".

وتیشى، "دواتریش تیمەکانى بەڕێوەبەرایەتى کۆچ و کۆچبەرانى سنورەکە خێمە و کەل و پەلى ناو ماڵ و خواردنیان بەسەر ئەو ماڵانەدا دابەشکرد کەزیانیان بەرکەتووە."