سەردێڕ:

دەروازەى ترێبیلى نێوان عێراق و ئەردەن لەیەک رۆژدا زیاتر لە دوو ملیار داهاتى هەبووە

فۆتۆ: 
2020-08-15

2511 جار خوێندراوەتەوە

دەستەى دەروازە سنورییەکانى عێراق رایگەیاند، بڕى داهاتى بەدەستهاتوو بۆ خەزێنەى دەوڵەت لە دەروازەى ترێبیلى نێوان عێراق و ئەردەن لەپارێزگاى ئەنبار گەیشتووەتە سەرووى دوو ملیار دینار.

دەستەکە ئاماژەى بەوەداوە، "داهاتى دەروازەکە لە رۆژى ١٤ى ئابدا بڕى دوو ملیار و ٣٨٤ ملیۆن و ٧٩٤ هەزار دینار بووە، کە سەرجەمیان لە گومرگى جوڵە بازرگانییەکانى دەروازەکەوە بەدەستهاتووە."

دەستەکە ئەوەشی خستووەتەڕوو، "هەڵکشانى داهاتى دەروازەکە بەو جۆرە لە ئەنجامى کارکردنى دەستەى دەروازە سنورییەکانى عێراقە بەشێوەیەکى پیشەیى و بەپلانێکى ئاستبەرز، بەشێوەیەک کە بەپێى یاسا بەرکارەکانى عێراق چاودێرى جوڵەى بازرگانى هەموو دەروازە سنورییەکان دەکەن و بەشێوەیەکى یاسایى چاودێرى و پشکنین بۆ هەموو جوڵەکانى نێو دەروازەکان دەکەن."

ئاماژەی بەوەشكردووە، "ئەوەش وەک جێبەجێکردنى بڕیارى سەرۆکوەزیرانى عێراق و بەرنامەى کارى حکومەتەکەیەتی، کە دەیەوێت دەروازە سنورییەکان رێکبخاتەوە و لەژێر چاودێرى حکومەتدا بێت و داهاتەکانیشیان بگەڕێتەوە بۆ خەزێنەى دەوڵەت."

پێشتریش، دەستەى دەروازە سنورییەکانى عێراق رایگەیاندبوو، داهاتى رۆژانەى بەندەرى ئوم قەسر زیادیکردووە و تەنیا لە یەک رۆژدا لە دوو ملیار دینار زیاتربووە.

هاوکات، لە ماوەی رابردوودا ئەوەش خرابووەڕوو، سەرەڕاى داخرانى بەشێک لە دەروازە سنورییەکان بەهۆی رێنماییەکانى قەدەغەى هاتوچۆوە، بەڵام داهاتى خاڵە سنورییەکان زیادیکردووە.