سەردێڕ:

تەندروستیی عێراق هەڵوێستی خۆی لەسەر ڤاکسینە روسیەکە ئاشکراکرد

فۆتۆ: 
2020-08-12

18783 جار خوێندراوەتەوە

وەزارەتی تەندروستی و ژینگەی عێراق جەختیکردەوە، بەهەماهەنگی لەگەڵ رێکخراوی تەندروستیی جیهانی لێکۆڵینەوە لە ڤاکسینە روسییەکە دەکات، بۆ دڵنیابوون لە گرەنتی و چالاکی پێکوتە نوێیەکە لە روبەڕوبوونەوەی کۆرۆنادا.

 حازم جومەیلی بریکاری وەزیری تەندروستیی عێراق بە میدیاکانی راگەیاند، "لایەنە هونەرییەکان لە وەزارەتی تەندروستیی و بەهەماهەنگیکردن لەگەڵ رێکخراوی تەندروستیی جیهانی لێکۆڵینەوە لە گرەنتی و چالاکی ڤاکسینە نوێیە روسیەکە دەکات بۆ روبەڕوبونەوەی کۆرۆنا."

ئاماژەی بەوەشکرد، "تائێستا زانیارییەکان لەبارەی ڤاکسینە نوێیەکە تەواونەبووە و نەگەیشتووەتە کۆتایی."

ئەوەشی ئاشکراکرد، "وەزارەتی تەندروستیی بۆی نیە هیچ ڤاکسینێک بەکاربهێنێت هەتا رێکخراوی تەندروستیی جیهانی دانی پێدانەنێت، چونکە رێککەوتن و هاوکاریکردنی یەکتری و هەماهەنگی لەنێوانماندا هەیە."

ئەوەشی روونکردەوە، "وەزارەتی تەندروستیی لەپەیوەندی بەردەوامدایە لەگەڵ نوێنەری رێکخراوی تەندروستیی جیهانی لە بەدواداچوونی وردەکارییەکانی ئەم بابەتە"، وتیشی، "لە پەیوەندی بەردەوامداین لەگەڵ دەسەڵاتدارانی تەندروستیی روسیا لەسەر وەرگرتنی رێوشوێنی پێویست و ئامادەکاری پێشوەختە لەسەر ڤاکسینەکە، ئەم رێوشوێنانە لەگەڵ هەموو ڤاکسینە نوێیەکان دەگیرێتەبەر لەپێناو دڵنیابوون لە سەلامەتی و چالاکی ڤاکسینەکە."

ئەوەش لەکاتێکدایە دوێنێ، ڤلادیمێر پوتین سەرۆکی روسیا بەفەرمی تۆمارکردنی یەکەمین ڤاکسینی کۆرۆنای لەلایەن وڵاتەکەیەوە لە جیهاندا راگەیاند.