سەردێڕ:

ئۆپراسیۆنە هاوبەشەكانی عێراق: بەغدا و هەولێر لەبارەی دەستدرێژیيەكەى توركیاوە گفتوگۆ دەکەن

فۆتۆ: 
2020-08-11

5220 جار خوێندراوەتەوە

وتەبێژی فەرماندەیی ئۆپراسیۆنە هاوبەشەكانی عێراق رایگەیاند، لەگەڵ هەرێمدا لە پەیوەندیدا دەبن، تاوەکو بزانرێت چۆن لایەنێک فەرماندە سەربازییەکانی عێراق لە خاکی عێراقدا دەکاتە ئامانج.

تەحسين خەفاجى وتەبێژی فەرماندەیی ئۆپراسیۆنە هاوبەشەكانی عێراق رایگەیاند، "لەبارەی هێرشەکانی تورکیاوە کە بووە هۆی شەهید بوونی دوو ئەفسەری پاسەوانی سنوری عێراق لەگەڵ بەرپرسانى هەرێمى كوردستاندا لە پەیوەندیداین و راوێژ دەکەین."

ئەوەشی خستووەتەڕوو، "چەند وردەکارییەکی دیکە هەیە کە لەگەڵ هەرێمدا گفتوگۆی لەگەڵدا دەکرێت، تاوەکو هۆکاری ئەو دەستدرێژییە بزانرێت، کە چۆن لایەنێک فەرماندە سەربازییەکانی عێراق لە خاکی خۆماندا دەکاتە ئامانج."

ئەوەش لە کاتێکدایە، ئەمڕۆ لە کاتی کۆبوونەوەی پاسەوانی سەر سنور و پەکەکەدا، فڕۆکەیەکی بێفڕۆکەوانی تورکیا ئۆتۆمبێلێکی سەربازی پاسەوانی سەر سنوری عێراقی کردە ئامانج، بەوهۆیەوە سێ سەربازی پاسەوانی سەر سنور و سێ گەریلای پەکەکە شەهید بوون.