سەردێڕ:

شەش گەریلا و سەربازی سنور بەهۆی بۆردومانەکەی تورکیاوە شەهید بوون

فۆتۆ: 
2020-08-11

7856 جار خوێندراوەتەوە

شانەی راگەیاندنی ئەمنی عێراق رایگەیاند، دوو ئەفسەر و سەربازێکی سەر سنور بەهۆی بۆردومانەکانی تورکیاوە شەهید بوون، و سەرچاوەیەکی پەکەکەش دەڵێت، سێ گەریلا هەر بەهۆی بۆردومانەکانەوە شەهید بوون

ئەمڕۆ سێشەممە، شانەی راگەیاندنی ئەمنی عێراق رایگەیاند، "تورکیا لە رێگەی فڕۆکەیەکی بێفڕۆکەوانەوە ئۆتۆمبێلێکی سەربازیمانی لە ناوچەی سیدەکان کردووەتە ئامانج."

ئەوەش خراوەتەڕوو، "لە بۆردومانەکەدا فەرماندەی لیوای ٢ی پاسەوانی سەر سنور و فەرماندەی فەوجی ٣ی پاسەوانی سەر سنور و شۆفێرەکەیان شەهید بوون."

هاوکات، سەرچاوەیەکی پەکەکە بە ئێن ئاڕ تی راگەیاند، "سێ گەریلایان شەهید بوون، کە گەریلایەکیان فەرماندەیە."

پێشتر، بەرپرسی راگەیاندن و پەیوەندیەکانی پاسەوانی سنوری عێراق لە هەرێم بە ئێن ئاڕ تی راگەیاند، "هێزێکی سوپای عێراق، کە بە نزیکەی ٣٠٠ سەرباز دەبن بە چەکی پێویستەوە رەوانەی سنورەکانی برادۆست کراون."

ئەوەشی خستەڕوو، "ئێمە فەرمان لە حکومەتی ناوەندییەوە وەردەگرین و حکومەتی ناوەندیش دەیەوێت چەند بارەگا و بازگەیەکی دیکە لە سەر سنورەکان دروستبکات."