سەردێڕ:

ئەمریکا: وەبەرهێنانی چین لە دورگە جێناکۆکەکان نایاساییە

فۆتۆ: 
2020-07-14

3515 جار خوێندراوەتەوە

وەزیری دەرەوەی ئەمریکا رایگەیاند، وەبەرهێنان و دروستکردنی پڕۆژە لە لایەن چینەوە لەو دورگانەی دەریای باشوری چین کە جێی ناکۆکی چەند وڵاتێکن نایاساییە.

مایک پۆمپیۆ وەزیری دەرەوەی ئەمریکا رایگەیاند، بانگەشەکانی پەکین بۆ خاوەنداری ئەو دورگانە هیچ بنەمایەکی یاسایی نییە و چین دەیەوێت لە رێگەی توندوتیژیەوە خواست و ویستی خۆی بەسەر وڵاتانی دیکەدا بسەپێنێت و لە هەوڵی بنیاتنانی ئیمپراتۆری دەریاییدایە.

وەزیری دەرەوەی ئەمریکا دورگە جێی ناکۆکیەکانی دەریای باشوری چینی بە بەشیک لە خاکی ڤێتنام، ئیندونیسیا و مالیزیا ناوبردووە، ئەمەش لە کاتێکدایە پێشتر واشنتۆن رایگەیاندبوو، لە مشتومڕەکانی پەیوەست بەو دورگانە لایەنگری لە هیچ وڵاتێک ناکات.

هاوکات، وڵاتانی وەک ڤێتنام، فلیپین، تایوان، ئیندونیسیا، مالیزیا و چین بانگەشەی خاوەنداری دورگەکانی دەریای باشوری چین دەکەن، بەڵام لە ساڵانی رابردوودا پەکین هەوڵیداوە لە رووی سەربازیەوە پێگەی خۆی لەو ناوچەیە زیاتر پتەو بکات و دەستی بە وەبەرهێنان لەو دورگانە کردووە.

لە هەفتەکانی رابردوودا، بەڕێوەچوونی مانۆڕی هاوکاتی ئەمریکا و چین لەو ناوچەیە گرژیەکانی توندتر کردبووەوە.