سەردێڕ:

مەسرور بارزانی: دەبێت هاوڵاتیان لە پاراستنی سامانی گشتیدا هاوکارمان بن

فۆتۆ: 
2020-07-14

9082 جار خوێندراوەتەوە

سەرۆکی حکومەتی هەرێم لە رێوڕەسمی کردنەوەی وێستگەی کارەبای هەڵمی خەباتدا رایگەیاند، دەبێت هاوڵاتیان یارمەتیمان بدەن لە بەفیڕۆنەچوونی سامانی گشتیدا.

ئەمڕۆ سێشەممە، مەسرور بارزانی سەرۆکی حکومەتی هەرێمی کوردستان لە ڕێوڕەسمی کردنەوەی وێستگەی کارەبای هەڵمی خەباتدا رایگەیاند، "ئەم پڕۆژەیە لە کابینەی پێشتردا دەستیپێکراوە و لەم کابینەیەدا تەواوکرا"، دەشڵێت، "داوامان لە وەزارەتی کارەبا و لایەنە بەرپرسیارەکان کردووە پێداچوونەوەیەک بە تۆڕی گشتی کارەبادا بکەن لە بەرهەمهێنان و گەیاندن و بەکارهێنانیدا و هەوڵدەدەین ڕێژەیەکی زیاتر گاز بۆ وێستگەکان دابین بکەن، بۆ ئەوەی وێستگەکان بتوانن ڕێژەیەکی زیاتر کارەبا بەرهەمبهێنن."

ئەوەشی خستەڕوو، "بە خستنە گەڕی وێستگەی کارەبای هەڵمی خەبات بەڕێژەی لەسەدا ١٠ بەرهەمی کارەبا زیاد دەکات."

راشیگەیاند، "چۆن هاوڵاتیان مافی ئەوەیان هەیە کارەبایان بۆ دابینبکرێت، لە بەرامبەریشدا ئەرکی هاوڵاتیانە کارەبا بە فیڕۆنەدەن."

باسی لەوەشکرد، "داوام لە وەزارەتی کارەبا کردووە لە ماوەیەکی نزیکدا چارەسەری گونجاو بۆ هەمیشە پێدانی کارەبا بە هاوڵاتیان لە سەر ئاستی کوردستان بدۆزنەوە."

ساڵانە لەگەڵ گۆڕانی وەرزەکان خواست لەسەر بەکارهێنانی کارەبا زیاد دەکات و هاوڵاتیانیش بەردەوام گرفتی کەمی کارەبایان هەیە، لە ساڵانی رابردووشدا چەندین جار بەرپرسانی هەرێم بەڵێنی زیادکردنی کاتژمێرەکانی کارەبا، یاخود پێدانی کارەبای هەمیشەییان بە هاوڵاتیان داوە، بەڵام سەرەڕای ئەوەی کارەبای نیشتیمانی نەکراوەتە هەمیشەیی، بەڵکو دۆخی کارەباش بەرەوپێشچوونی بەخۆوە نەبینیوە.