سەردێڕ:

کازمی: رێگەنادەین لە دەروازە سنورییەکاندا موڵکی گشتی بدزرێت

فۆتۆ: 
2020-07-11

42012 جار خوێندراوەتەوە

دوای کۆنتڕۆڵکردنەوە دەروازەی مونزریەی دیالە لە لایەن هێزەکانی بەرپەرچدانەوەی خێرا، سەرۆک وەزیرانی عێراق سەردانی دەروازەکەی کرد و رایگەیاند، رێگەنادەین لە دەروازە سنورییەکانەوە موڵکی گشتی بدزرێت.

مستەفا کازمی لە کۆنفرانسێکی رۆژنامەنوسیدا رایگەیاند، پەیامیان بۆ سەرجەم گەندەڵکاران رون و ئاشکرایە لەمەودوا چاودێری خاڵە سنورییەکان توندتر دەکرێتەوە و سەرجەم لایەنەکانی دەوڵەتیش کار لەسەر بەرەنگاربونەوەی گەندەڵی دەکەن.

ئاماژەی بەوەشکرد، "سەردانەکەی بۆ دەروازەی مونزریە نامەیەکی روونە بۆ گەندەڵکاران کە چیتر لەم شوێنە بونیان نامێنێت، حکومەت پلانێکی گشتگیری بۆ بەرەنگاربونەوەی گەندەڵی، ئامادە کردووە و ئامادەیە هەمو قوربانییەک بدات.

سەرۆک وەزیرانی عێراق ئەوەشی خستوەتەڕو، دەسەڵات دراوەتە سەرۆکی دەستەی دەروازە سنورییەکان بۆ بەرەنگاربونەوە گەندەڵکاران لەسەرجەم دەروازە سنورییەکاندا.

سەرلەبەیانی ئەمڕۆ، ئۆپراسیۆنە هاوبەشەکانی عێراق لە ڕاگەیەندراوێکدا ئاماژەی بەوەکرد، کە بە فەرمانی مستەفا کازمی، هێزەکانی وەڵامدانەوەی خێرا دەستیان بەسەر دەروازەکانی مەندەلی و مەنزریەدا گرتووە لە پارێزگای دیالە.