سەردێڕ:

لە سۆران موچە بە شێوەی دلیڤەری دابەشدەکرێت

فۆتۆ: 
2020-07-10

11468 جار خوێندراوەتەوە

ئەوقافی سۆران رایگەیاند، لەپێناو سەلامەتی هەموواندا، موچەی مامۆستایانی ئایینی سنورەکەی بە شێوەی دلیڤەری (گەیاندن) دابەشدەکات.

ئەوقافی سۆران رایگەیاند، "لەپێناو سەلامەتی هەموولایەک، سبەینێ شەممە، لە کاتی سەرلەبەیانیدا موچەی ناو شاری سۆران و ناحیەی دیانا و سیدەکان، لە رێگەی دوو ژمارە مۆبایلەوە و بە شێوەی دلیڤەری دابەشدەکرێت."

روو بە مامۆستایانی ئایینی سنورەکە راشیگەیاند، "لە خەلیفان و دەوروبەری کاتژمێر ٢ی پاشنێوەڕۆ لە هۆڵی مزگەوتی غەزالی کە ناسراوە بە هۆڵی (حسێن کەریم) ئامادەبن، بە مەرجی بەستنی دەمامک و دەستەوانە."

دەشڵێت، "ئەوقافی چۆمان و ڕواندز و مێرگەسوریش بە هەماهەنگی لەگەڵ قائمقامەکان، میکانیزمی دابەشکردنی موچە لای خۆیان ڕادەگەیەنن."

دابەشکردنی موچە لەکاتێکدایە، رۆژی ٢١ی مانگی رابردوو، حکومەتی هەرێم چەند بڕیارێکی نوێی بۆ کەمکردنەوەی موچە و دەرماڵەی فەرمانبەران دەرکرد و بەپێی بڕیارەکان بە رێژەی ٢١٪ موچەی فەرمانبەران و موچەخۆرانی هەرێم کەمکرایەوە.

نزیکەی ٦٠ رۆژە موچە دابەشنەکراوە، سەرباری ئەوەی بەغدا لە مانگی رابردوودا بڕی ٤٠٠ ملیار دیناری رەوانەی هەرێم کرد، دواتر حکومەتی هەرێم رایگەیاند، بۆ دابەشکردنی موچەی مانگی یەک قەرزی لە کۆمپانیاکان کردووە و بڕێکی زۆری پارەکەی بەغدای بۆ دانەوەی ئەو قەرزانە تەرخان کردووە، بەو هۆیەوە دابەشکردنی موچە دواکەوتووە.

عەبدۆ رۆستایی، سۆران