سەردێڕ:

لیژنەی فەتوای سلێمانی: دانانی پرسەمان قەدەغەكردووە

فۆتۆ: 
2020-07-10

35299 جار خوێندراوەتەوە

سەرۆکی لیژنەی فەتوای سلێمانی ڕایگەیاند، فەتوایان داوە پرسە و کۆڕ و کۆبوونەوەکان لە ئێستادا بە هۆی كۆرۆناوە قەدەغە بکرێت.

محەمەد عەبدوڵا، سەرۆکی لیژنەی فەتوای سلێمانی، بە ئێن ئاڕ تی ڕاگەیاند، "ئێمە پێشتر فەتوامان داوە و وتوومانە، كە هەر كۆبوونەوەیەك ببێتە هۆی گواستنەی كۆرۆنا نادروستە و لەپێناو پاراستنی تەندروستی دانیشتوانی كوردستاندا قەدەغەمانكردووە."

ئاماژەی بەوەشكرد، "جێبەجێكردنی ڕێكارەكانی خۆپارێزی لە كۆرۆنا ئەركی حكومەت و لایەنە پەیوەندیدارەكانە، چونكە ئێمە دەزگای ئاسایش و پۆلیسمان نیە وەك زانایان."

وتیشی، "لەپێناو خزمەتكردن و پاراستنی تەندروستی هاوڵاتیانی هەرێمی كوردستاندا، ئێمە لە مزگەوتەكاندا نوێژی بەكۆمەڵمان ڕاگرتووە."

هەر ئەمڕۆ، محەمەد قادر، وتەبێژی تەندروستی هەرێم ڕایگەیاند، ئەو دەروێشانەی هاتوونەتە هەرێم دەبێت ١٤ رۆژ کەرەنتین بکرێن چونکە بە گومانلێکراو هەژماردەکرێن.

ئەمەش لەکاتێکدایە، دوێنێ بەمەبەستی بەشداریکردنیان لە بەخاکسپاردنی تەرمی شێخ محەمەدی کەسنەزانی سەرۆکی تەریقەتی قادری، سەدان مورید و دەروێشی تەریقەتەکە لە باشماخ و بازگەکانی نێوان سلێمانی و چەند پارێزگایەک بەبێ پشکنین تێپەڕین.