سەردێڕ:

تەندروستی هەرێم: دەروێشەکان وەکو گومانلێکراوی کۆرۆنا سەیردەکرێن

فۆتۆ: 
2020-07-10

61699 جار خوێندراوەتەوە

وتەبێژی تەندروستی حکومەتی هەرێم راگەیاند، ئەو دەروێشانەی هاتوونەتە هەرێم دەبێت ١٤ رۆژ کەرەنتین بکرێن چونکە بە گومانلێکراو هەژماردەکرێن.

محەمەد قادر، وتەبێژی تەندروستی هەرێمی کوردستان بە ئێن ئاڕ تی راگەیاند، ئەو دەروێشانە بە نایاسایی هاتوونەتە ناو خاکی هەرێم و ئەگەر رێگری لەم جۆرە رووداوانە نەکرێت کارەسات بەدوای خۆیدا دەهێنێت.

باسی لەوەشکرد، تەنیا دوێنێ زیاتر لە دوو هەزار دەروێش هاتوونەتە ناو خاکی هەرێم، بەڵام ئەمڕۆ هیچ کەس داخڵ نەبووە بە بێ کەرەنتینکردن.

وتەبێژی تەندروستی حکومەت ئەوەشی وت، تیمەکانیان توانای ئەوەیان نییە لە دەروازە سنورییەکان رێگری بکەن و دەبێت لایەنە پەیوەندیدارەکان سکاڵا لە دژی هەر کەسێک تۆماربکەن کە بێ پشکنین دێنە ناو خاکی هەرێم.

ئەمەش لەکاتێکدایە، دوێنێ بەمەبەستی بەشداریکردنیان لە بەخاکسپاردنی تەرمی شێخ محەمەدی کەسنەزانی سەرۆکی تەریقەتی قادری، سەدان مورید و دەروێشی تەریقەتەکە لە باشماخ و بازگەکانی نێوان سلێمانی و چەند پارێزگایەک بەبێ پشکنین تێپەڕین.