سەردێڕ:

ڤیدیۆ.. زیاتر لە سێ هەزار دەروێش دەروازەی باشماخیان بەزاند

فۆتۆ: 
2020-07-09

50960 جار خوێندراوەتەوە

بەڕێوەبەری پەیوەندیەکانی مەرزی باشماخ رایگەیاند، ژمارەیەکی زۆری دەروێش سنوری دەروازەکەیان بەزاند و بێ پشکنین هاتنە ناو هەرێمەوە، دەشڵێت، "لەلایەن سوپای پاسدارانی ئێرانەوە چوار لەو دەروێشانە بریندار کراون." 

موختار عەلی بەڕێوەبەری پەیوەندیەکانی مەرزی نێودەوڵەتی باشماخ بە ئێن ئاڕ تی رایگەیاند، "ژمارەیەکی زۆری دەروێش سنوری دەروازەی نێودەوڵەتی باشماخیان بەزاند و بێ پشکنین هاتوونەتە ناو سنوری هەرێمەوە و دەروێشەکان دەروازە سنورییەکەیان لە هەردوو دیوەوە بەزاندوە"، دەشڵێت، "لەناو ئەو دەروێش و موریدانەدا کورد زمان و فارس زمان و تورک زمان هەیە."

باسی لەوەشکرد، "هێزەکانی ئێران لە سنور هەوڵیان داوە رێگری لەو دەروێشانە بکەن و تەقەشیان بەسەردا کردوون، بەوهۆیەوە لەلایەن سوپای پاسدارانی ئێرانەوە چوار لەو دەروێشانە بریندار کراون"، ئەوەشی خستەڕوو، "زەرەر و زیانێکی زۆر بە کەلوپەل و کەرەستەکانی مەرزەکە کەوتووە."

ئاماژەی بەوەشکرد، "هیچ کامێک لەو دەروێش و موریدانەی کە مەرزەکەیان بڕیوە پشکنینیان بۆ نەکراوە و هەموویان یاسایان شکاندووە." 

هاتنی ئەو درەوێشانە بەمەبەستی بەشداریکردنیانە لە مەراسیمی بەخاكسپاردنی تەرمی شێخ محەممەدی كەسنەزانی كە بڕیارە رۆژی هەینی ١٠ی ئەم مانگە بەخاكبسپێدرێ‌.