سەردێڕ:

پارێزگاری سلێمانی چەند بڕیارێکی نوێی دەرکرد

فۆتۆ: 
2020-07-09

47404 جار خوێندراوەتەوە

ژووری ئۆپەراسیۆنەکانی پارێزگای سلێمانی رایگەیاند، لە رۆژی یەکشەممە ١٢ی ئەم مانگەوە، دەوامی گشت دامودەزگا حکومییەکان دەستپێدەکاتەوە، دەشڵێت، "هاتوچۆی ئۆتۆمبێل لە سەنتەری سلێمانیدا لە رۆژی یەکشەممەوە ئاسایی دەکرێتەوە."

 

دەقی بڕیارەکان:

١. بەردەوامبوون لەسەر ئەو خاڵانەی لە گشتاندنی رۆژی ٣ی تەمموزی ٢٠٢٠ی لیژنەی باڵای ئۆپەراسیۆنەکانی پارێزگای سلێمانی بۆ بەرەنگاربوونەوەی کۆرۆنا دیاریکراون، جگە لەو خاڵانەی لەم گشتاندنەدا دیاریکراون.

٢.  لە ڕۆژی یەکشەممە ١٢ی تەمموزی ٢٠٢٠وە دەوامی فەرمیی گشت دامودەزگا حکومیەکان بەپێی بڕیار و مەرج و رێکار و رێنماییە تەندروستیی و خۆپارێزییەکانی پێشتر راگەیەندراون، دەستپێدەکاتەوە.

٣. هاتوچۆی ئۆتۆمبێل لە سەنتەری ناوبازاڕی شاری سلێمانیدا لە ڕۆژی ١٢ی تەمموزی ٢٠٢٠وە بەپێی رێکار و رێنماییە تەندروستیی و کارگێڕی و ئارامییەکان ئاسایی دەکرێتەوە.

٤. سەرۆکایەتی شارەوانی سلێمانی و بەشی لابردنی زیادەڕەوی شارەوانیی بەپێی یاسا و رێنماییەکان رێکاری پێویست بەرامبەر هەر سەرپێچی و لادان و زیادەڕەوییەک دەگرنەبەر و ئەرکی هەموو هاوڵاتیان و دامودەزگا حکومییەکان و دامەزراوە دادوەرییەکان و کەرتی تایبەتە هاوکار و هەماهەنگیان بن.

٥. لە رۆژی شەممە ١١ی تەمموزی ٢٠٢٠وە تاقیکردنەوە وەزارییەکانی ١٢ی ئامادەیی دەستپێدەکات، بۆ باش بەڕێوەچوونی کەشی تاقیکردنەوەکان و لەسەر پێشنیازی بەڕێوەبەرێتیی گشتیی کارەبای سلێمانی، بەسوپاسەوە موەلیدە ئەهلیەکانی سنوری پارێزگای سلێمانی لەکاتی نەبوونی کارەبای نیشتمانیدا، کارەبای پێویست لە رۆژ و ماوەی دیاریکراوی تاقیکردنەوەکاندا بۆ خوێندنگا و هۆڵەکانی تاقیکردنەوە دابین دەکەن.