سەردێڕ:

لە سلێمانی بەشێک لە پێشمەرگە دێرینەکان گردبوونەوە

فۆتۆ: 
2020-07-09

7340 جار خوێندراوەتەوە

پەیامنێری ئێن ئاڕ تی رایگەیاند، بەشێک لە پێشمەرگە دێرینەکان دژی دواکەوتن و کەمکردنەوەی موچە گردبوونەوە.

گۆران لوقمان پەیامنێری ئێن ئاڕ تی لە سلێمانی رایگەیاند، بەشێک لە پێشمەرگە دێرینەکان دژی دواکەوتن و کەمکردنەوەی موچە و خراپی دۆخ و گوزەرانی خۆیان و هاوڵاتیان گردبوونەوە و داوایان کرد موچەکانیان لەکاتی خۆیدا و بەبێ کەمکردنەوە دابەشبکرێت.

بەشداربوویەکی گردبوونەوەکەش دەڵێت، "ئێمە وەک دەستەیەک لە پێشمەرگە دێرینەکانی ناڕازی ناو یەکێتی نیشتیمانی کوردستان، هاتووین بە دەسەڵات بڵێن چیتر لە ئاست دزی و چەوساندنەوەکانتاندا بێدەنگ نابین"، دەشڵێت، "ئێمە بەژاداربووین لە راماڵینی دەسەڵاتی بەعس و کۆتایمان پێهێنان، بەڵام ئێستا دەسەڵاتی کوردی هاوڵاتیان و خەڵک دەچەوسێنێتەوە."

ئەوەشی خستەڕوو، "ئێمە بەو دەسەڵاتە دەڵێین تەنیا مانگێک مۆڵەتتان هەیە، دوای ئەوە ئەو پێشمەرگانەی لێرەن و هەزاران پێشمەرگەی تر راپەرینێکی نوێ بەرپادەکەین"، دەشڵێت، "ئەگەر ئەم دەسەڵاتە نەیەت بە دەنگمانەوە و بە هاوڵاتی ئەم وڵاتەمان نەزانێت و مافە رەواکانمان بۆ دابین نەکات ئەوا ئێمەش بە چەک و راپەرین وەڵامیان دەدەینەوە."

پێشمەرگەیەکی دێرینی دیکەش باس لەوەدەکات، "بە دەسەڵات دەڵێین رازی نابین نەموچەمان دوابکەوێت، نەموچەمان ببڕێت"، دەشڵێت، "ئێمە جەماوەرمان لەگەڵدایە و لەسەر شەقامەوە بە دەسەڵات دەڵێین ئەمە دواجارە و تاوەکو کەی بەوجۆرە بەردەوام دەبن."

لە ماوەی رابردوودا، چەندین جار مامۆستایان و فەرمانبەران و خانەنشینان دژی کەمکردنەوە و دابەشنەکردنی موچەکانیان لەکاتی خۆیدا گردبوونەوە و خۆپیشاندانیان کردووە.